کراچی بڑی تباہی سے بچ گیا، محرم کے جلوس پر خودکش حملے کی منصوبہ بندی کرنے والا دہشت گرد گرفتار

جمعرات 11 جولائی 2024 18:18

کراچی(اُردو پوائنٹ اخبارتازہ ترین - این این آئی۔ 11 جولائی2024ء) شہر قائد میں8محرم کے جلوس پر حملے کی منصوبہ بندی کرنے والا دہشت گردپکڑا گیا،قبضے سے خودکش جیکٹ بھی برآمدہوئی ہے،کے پی حکومت نے مذکورہ دہشت گرد کی زندہ یامردہ گرفتاری پر20لاکھ روپے انعام مقرر کررکھا تھا۔تفصیلات کے مطابق کراچی میں دہشت گردی کا منصوبہ ناکام بنادیا گیا، ڈی آئی جی سی ٹی ڈی آصف اعجاز شیخ نے پریس کانفرنس کرتے ہوئے بتایا کہ کالعدم ٹی ٹی پی درہ آدم خیل کے دہشت گرد شعیب کو اتحاد ٹائون سے گرفتار کرلیا گیا ہے۔

(جاری ہے)

انہوں نے کہاکہ دہشت گرد شعیب آٹھ محرم کے اورنگی ٹائون جلوس پر خودکش حملے کی منصوبہ بندی کررہا تھا۔ڈی آئی جی سی ٹی ڈی نے کہا کہ دہشت گردجب کراچی آیاتوکالعدم ٹی ٹی پی نیٹ ورک جوائن کیا، گرفتاردہشت گرد سے کافی تفصیلات ملی ہیں اور اس کے قبضے سے خودکش جیکٹ بھی برآمد کرلی گئی ہے۔انھوں نے بتایا کہ دہشتگرد شعیب کوزندہ یامردہ پکڑنے پرکے پی حکومت نے 20 لاکھ روپے انعام رکھا تھا، ملزم نے ساتھیوں کے ساتھ مل کر خیبرایجنسی سے 16 مزدروں کوقتل بھی کیا گیا۔سی ٹی ڈی کے مطابق ملزم درہ آدم خیل کاکمانڈر ہے جو کراچی میں اپنا نیٹ ورک منظم کرنے کی کوشش کر رہا تھا۔