موجودہ غیریقینی صورتحال میں سیاستدانوں کا ہی نہیں عدلیہ کا بھی حصہ ہے

9مئی واقعے کے فوری بعد پی ٹی آئی پر پابندی لگانی چاہیے تھی، پی ٹی آئی کی پچھلے ڈیڑھ دو سال سے دشمن سرگرمیاں جاری ہیں، اب تو پی ٹی آئی رہنماء شہدا ء کے جنازے اور تعزیت کیلئے بھی نہیں جاتے، وزیردفاع خواجہ آصف

ثنااللہ ناگرہ جمعرات 18 جولائی 2024 21:54

موجودہ غیریقینی صورتحال میں سیاستدانوں کا ہی نہیں عدلیہ کا بھی حصہ ..

اسلام آباد ( اردوپوائنٹ اخبارتازہ ترین۔ 18 جولائی 2024ء) وزیر دفاع خواجہ آصف نے کہا ہے کہ موجودہ غیریقینی صورتحال میں سیاستدانوں کا ہی نہیں عدلیہ کا بھی حصہ ہے، 9 مئی واقعے کے فوری بعد پی ٹی آئی پر پابندی لگانی چاہیے تھی، پی ٹی آئی کی پچھلے ڈیڑھ دو سال سے ملکی مفاد کے منافی سرگرمیاں جاری ہیں، اب تو پی ٹی آئی رہنماء شہدا ء کے جنازے اور تعزیت کیلئے بھی نہیں جاتے۔

انہوں نے ہم نیوز کے پروگرام میں گفتگو کرتے ہوئے کہا کہ فچ کریڈٹ ریٹنگ ایجنسی ہے، وہ جب کریڈٹ ریٹنگ کرتے ہیں تو سیاسی حالات کو بھی جانچتے ہیں، ہوسکتا ہے ان کے پاس کوئی فارمولہ ہو، جو وہ ایگزیکٹ 18مہینے کی حکومت کہہ رہے ہیں، حالات میں گومگو ں کی کیفیت ضرور ہے لیکن ایسی کوئی صورتحال نہیں کہ سسٹم لپیٹا جائے، وہ ہماری حکومت کی نہیں بلکہ سسٹم لپیٹنے کی بات کررہے ہیں، جب ٹیکنوکریٹ سسٹم آئے گا تو لازمی طور پر جمہوری ادارے لپیٹے جائیں گے۔

(جاری ہے)

موجودہ غیریقینی صورتحال میں سیاستدانوں کا ہی نہیں عدلیہ کا بھی حصہ ہے۔ انہوں نے کہا کہ پیپلزپارٹی ہمارے ساتھ ہے لیکن وہ ایک الگ جماعت ہے ان کی اپنی اپروچ ہے، پی ٹی آئی پر پابندی کیلئے اتحادی جماعتوں کو اعتماد میں لینا چاہیے تھا۔ پی ٹی آئی کو 9مئی اور سائفر واقعے سے دیکھ لیں ، سائفر کو بین الاقوامی سطح پر اچھالنا بھی ملک دشمنی ہے، پی ٹی آئی کو صیہونی لابی نے لانچ کیا اور مالی معاونت بھی کی، جب بھی پی ٹی آئی کی ذات پر کوئی حرف آیا اس نے ملک اور ادارو ں پر حملہ کیا، پی ٹی آئی پر 9مئی واقعے کے فوری بعد پابندی لگانی چاہیے تھی، اور باقی اقدامات بھی اٹھانے چاہئیں تھے، سواسال گزر گئے ، جو ہندوستان نہ کرسکا، وہ پی ٹی آئی نے کردیا، اب اس قدر فاصلہ اختیارکرلیاکہ شہدا ء کے جنازے اور تعزیت کرنے بھی نہیں جاتے، پی ٹی آئی کی پچھلے ڈیڑھ دو سال سے ملکی مفاد کے منافی سرگرمیاں جاری ہیں، آپریشن کی مخالفت کی ، میرا اندازہ ہے کہ آئندہ 10روز میں حالات واضح ہوجائیں گے۔