سکھر کا 300 ملی میٹر بارش ریکارڈ کا دعویٰ، محکمہ موسمیات نے تردید کردی

پیر 19 اگست 2024 22:28

کراچی (اُردو پوائنٹ اخبارتازہ ترین - آن لائن۔ 19 اگست2024ء) محکمہ موسمیات نے سکھر میں 2 روز کے دوران 300 ملی میٹر بارش کا دعویٰ غلط قرار دے دیا۔چیف میٹرولوجسٹ سردار سرفراز کا کہنا ہے کہ سکھر کے قریب روہڑی میں 134 ملی میٹر بارش ریکارڈ ہوئی۔محکمہ موسمیات کے میٹرولوجسٹ انجم نذیر نے نجی ٹی وی بات کرتے ہوئے کہا کہ 2002ء سے 2003ء کے دوران سندھ کے ہر تعلقہ میں رین گیجز کی تنصیب ہوئی، ہر تعلقہ انچارج کو ہر ماہ رپورٹ محکمہ موسمیات کو کرنے کا ذمہ دار بنایا گیا تھا۔

انجم نذیر کا کہنا ہے کہ ریونیو آفیسرز کے مسلسل ٹرانسفر کی وجہ سے رین گیجز کا ریکارڈ صحیح طور پر مرتب نہیں کیا جاسکا، رین گیجز پر ریکارڈ بارش متعلقہ تعلقہ کی تو ہوسکتی ہے پورے سکھر کی نہیں۔انہوں نے کہا کہ نئے آنے والے ریونیو آفیسرز کی تربیت نہ ہونے کے باعث انہیں رین گیج کا استعمال نہیں آتا، رین گیجز کا مرتب کردہ ریکارڈ عالمی معیار کے مطابق تسلیم نہیں کیا جاتا، بین الاقوامی معیار کے مطابق صرف آبزرویٹری کا ریکارڈ مستند ہوتا ہے۔

(جاری ہے)

ان کا کہنا ہے کہ سکھر آبزرویٹری 1997ء میں قائم کی گئی، کسی بھی آبزرویٹری کا 30 سال کا ریکارڈ بین الاقوامی سطح پر تسلیم کیا جاتا ہے، سکھر آبزرویٹری کو قائم ہوئے صرف 27 سال ہوئے ہیں، محکمہ موسمیات عالمی موسمیاتی ادارے کے معیار کے مطابق بارش کا ریکارڈ مرتب کرتا ہے۔انجم نذیر نے کہا کہ سکھر آبزرویٹری کے مطابق 10 ستمبر 2012ئ میں 24 گھنٹے میں 168.2ملی میٹر بارش ریکارڈ کی گئی تھی جبکہ 4 اگست 2008ء میں 92 ملی میٹر بارش ہوئی۔ میٹرولوجسٹ انجم نذیر نے کہا کہ سکھر میں گزشتہ روز کی 100 ملی میٹر بارش نے 2008ء کی بارش کا کا ریکارڈ توڑا ہے، 77 سال کی بارش کی تاریخ کا ریکارڈ ٹوٹنے کا دعویٰ غلط ہے