الیکشن کمیشن نے ویب سائٹ پر اپ لوڈ فارم 45، 47 و دیگر کی تصدیق کیلئے افسران کی ڈیوٹی لگادی

چیف الیکشن کمشنر سکندر سلطان راجہ نے مختلف انتخابی فارمز کی تصدیق کی منظوری دے کر نوٹی فکیشن بھی جاری کر دیا

ساجد علی جمعرات 5 ستمبر 2024 12:29

اسلام آباد ( اُردو پوائنٹ اخبارتازہ ترین۔ 05 ستمبر 2024ء ) الیکشن کمیشن آف پاکستان نے اپنی ویب سائٹ پر اپ لوڈ ہونے والے فارم 45، 47 و دیگر کی تصدیق کیلئے افسران کی ڈیوٹی لگادی۔ میڈیا رپورٹس کے مطابق الیکشن کمیشن نے ویب سائٹ پر اپ لوڈ فارم 45، 46، 47، 48 اور 49 کی تصدیق کے لیے افسران کو ذمے داری سونپ دی ہے، اس سلسلے میں چیف الیکشن کمشنر سکندر سلطان راجہ نے فارمز کی تصدیق کی منظوری دے کر نوٹی فکیشن بھی جاری کر دیا۔

نوٹیفکیشن میں بتایا گیا ہے کہ این اے 1 سے 266 تک فارمز کی تصدیق کے ٹیم لیڈر محمد ناصر خان ہوں گے جب کہ پی کے 1 سے 115 تک کے ٹیم لیڈر کاشف عباس ملک ہوں گے، پی پی 1 سے297 تک کے لیے ٹیم لیڈر بھی کاشف عباس ملک کو تعینات کردیا گیا، اس کے علاوہ پی ایس 1 سے 120 تک کے ٹیم لیڈر بھی کاشف عباس ملک ہی ہوں گے اور پی بی 1 سے 51 تک کے لیے ٹیم لیڈر کی ذمہ داری بھی کاشف عباس ملک کو ہی دی گئی ہے، وقاص ملک کو تصدیق کے عمل کے لیے سپروائزر مقرر کردیا گیا، فارمز کی تصدیق کے انچارچ سید ندیم حیدر ہوں گے۔

(جاری ہے)

نوٹیفکیشن سے معلوم ہوا ہے کہ پولنگ سٹیشنز کی لسٹ کے لحاظ سے ان افسران پر مشتمل ٹیمیں اپ لوڈ فارم 45 اور 46 کی تصدیق کریں گی جب کہ مسنگ فارم 45 اور 46 کی نشاندہی بھی کی جائے گی، جس کے نتیجے میں مسنگ فارم 45 اور 46 کی تفصیلات تیار کی جائیں گی، الیکشن کمیشن کی تشکیل کردہ ٹیمیں ان فارمز کی بھی شناخت کریں گی جو پڑھنے کے قابل نہیں ہیں۔ بتایا جارہا ہے کہ ٹیمیں اس کی بھی تصدیق کریں گی کہ تمام فارم 47، 48 اور 49 اپ لوڈ کیے گئے ہیں، ٹیمز کو اپنا کام 7 روز میں مکمل کرنے کی ذمے داری سونپ دی گئی ہے، ذرائع ای سی پی کا کہنا ہے کہ یہ کوئی بڑا معاملہ نہیں ہے بس چیکنگ کر رہے ہیں، جس کا مقصد یہ چیک کرنا ہے کہ انتخابی نتائج سے متعلق فارمز ویب سائٹ پر درست انداز سے اپ لوڈ ہوئے یا نہیں، 92 ہزار پولنگ سٹیشنز کے فارمز دیکھنا مشکل کام ہوتا ہے، اس لیے حلقوں کے لیے ٹیمیں بنائی گئی ہیں کہ وہ فارمز کو کنفرم کریں۔