چیمپئنز ٹرافی: آئی سی سی وفد آئندہ چند روز میں پاکستان کا دورہ کرے گا

لاہور (اردو پوائنٹ تازہ ترین اخبار ۔ 9 ستمبر 2024ء ) آئی سی سی چیمپئنز ٹرافی 2025ء کے انتظامات کا جائزہ لینے آئی سی سی کا پانچ سے چھ رکنی وفد رواں ہفتے پاکستان کا دورہ کرے گا۔ ایکسپریس نیوز کے ذرائع کے مطابق وفد چیمپئنز ٹرافی 2025ء کے لیے مجوزہ وینیوز کا معائنہ کرے گا۔ ٹیموں کے پریکٹس میچز، ٹکٹنگ سمیت دوسرے اہم ایشوز پر وفد پی سی بی حکام سے ملاقاتیں کرے گا۔

وفد ارکان میں مختلف شعبوں کے سربراہان اور نمائندے شامل ہوں گے۔ وفد کی پاکستان آمد اور مصروفیات کا شیڈول دو سے تین روز میں طے ہو جائے گا، اس سے قبل آئی سی سی کے پچ کنسلٹنٹ، سکیورٹی ہیڈ اور ایونٹس کے لوگ تین دورے کر چکے ہیں۔ لاہور اور کراچی کے اسٹیڈیمز کی اپ گریڈیشن پاکستان کرکٹ بورڈ کے لیے اہم چیلنج ہے، پی سی بی سربراہ محسن نقوی نے دونوں اسٹیڈیمز میں تعمیراتی کاموں کی تکمیل کے لیے 31 دسمبر کی ڈیڈ لائن رکھی ہے۔

(جاری ہے)

پنڈی اسٹیڈیم میں کوئی ایسا بڑا کام نہیں ہوگا جس سے کوئی ایشو ہو۔ لاہور اور کراچی کے اسٹیڈیمز کی بروقت تکمیل پر آئی سی سی حکام کو قائل کرنا بھی بورڈ حکام کے لیے بڑا ٹاسک خیال کیا جارہا ہے۔