صدارتی مباحثہ، کملا ہیرس اور ڈونلڈ ٹرمپ کی ایک دوسرے پر الزامات کی بوچھاڑ

واشنگٹن (اُردو پوائنٹ اخبارتازہ ترین - اے پی پی۔ 11 ستمبر2024ء) ریپبلکن پارٹی کے صدارتی اُمیدوار ڈونلڈ ٹرمپ اور ڈیموکریٹک پارٹی کی نائب صدر کملا ہیرس کے درمیان پہلے مباحثے میں اسقاطِ حمل، معیشت، امیگریشن اور سابق صدر کو درپیش قانونی اُلجھنوں پر زبردست بحث ہوئی ۔اردو نیوز کے مطابق امریکا میں ریپبلکن پارٹی کے صدارتی امیدوار ڈونلڈ ٹرمپ اور ڈیموکریٹک امیدوار کملا ہیرس میں ریاست پنسلوانیا میں پہلا صدارتی مباحثہ ہوا جو 90 منٹ تک جاری رہا۔

کملا ہیرس نے کڑی تنقید کا سلسلہ جاری رکھا جس نے ڈونلڈ ٹرمپ کو اضطرابی کیفیت سے دوچار کر دیا اور بظاہر مشتعل نظر آنے والے سابق صدر ڈونلڈ ٹرمپ نے جواب میں اپنی حریف کے خلاف جھوٹ پر مبنی بیانات دیئے۔ڈونلڈ ٹرمپ نے کہا کہ ان کی ریلیاں سب سے بڑی اور سیاست کی تاریخ کی سب سے غیرمعمولی ریلیاں ہیں۔

(جاری ہے)

ڈونلڈ ٹرمپ نے غیرمصدقہ سازشی تھیوری کی جانب اشارہ کیا جس میں کہا گیا تھا کہ تارکین وطن سپرنگ فیلڈ، اوہائیو میں شہریوں کے پالتو جانور کھا رہے ہیں،وہ کتوں کو کھا رہے ہیں۔

اس موقع پر کملا ہیرس نے اپنی بات یہ کہتے شروع کی کہ اسے کہتے ہیں انتہا۔کملا ہیرس نے ایک پورن سٹار کو پیسے دینے سمیت دیگر مقدمات پر ڈونلڈ ٹرمپ کو تنقید کا نشانہ بنایا۔ڈونلڈ ٹرمپ نے کسی بھی جرم کا مرتکب ہونے کی تردید کی اور ایک بار پھر کملا ہیریس اور ڈیموکریٹس پر الزام عائد کیا کہ انہوں نے ثبوتوں کے بغیر ان کے خلاف تمام مقدمات بنائے۔

صدارتی امیدواروں کے درمیان بحث کا آغاز معیشت سے متعلق سوال سے ہوا اور یہ ایک ایسا مسئلہ ہے جس کے حوالے سے پولز ٹرمپ کے حق میں ہیں۔کملا ہیرس نے ڈونلڈ ٹرمپ کے غیر ملکی اشیا ءپر زیادہ سے زیادہ محصولات عائد کرنے کے ارادے پر تنقید کرتے ہوئے کہا کہ ٹرمپ نے ہمارے لیے بدترین بے روزگاری چھوڑی۔ ڈونلڈ ٹرمپ نے بائیڈن انتظامیہ کی مدت کے دوران افراطِ زر میں مسلسل اضافے پر کملا ہیرس کو تنقید کا نشانہ بنایا اور اس دوران وہ مہنگائی کی شرح کو بڑھا چڑھا کر پیش کرتے رہے۔

انہوں نے اپنے سرِفہرست مسئلے امیگریشن کے حوالے سے بات کرتے ہوئے بغیر ثبوت ایک بار پھر دعویٰ کیا کہ تارکین وطن میکسیکو کے ساتھ امریکی جنوبی سرحد عبور کر رہے ہیں۔انہوں نے کہا کہ مہنگائی لوگوں کے لیے، متوسط ​​طبقے کے لیے، ہر طبقے کے لیے تباہی بنی ہوئی ہے۔کملا ہیرس اسقاطِ حمل کے حوالے سے بات کرتے ہوئے جذباتی ہو گئیں اور انہوں نے سپریم کورٹ کے 2022 کے فیصلے پر تنقید کرتے ہوئے دعویٰ کیا کہ ڈونلڈ ٹرمپ نے جان بوجھ کر تین قدامت پسند سپریم کورٹ ججز کا انتخاب مخصوص نیت سے کیا اور آخرکار، ان کی حکومت کے دوران یہ فیصلہ منسوخ کر دیا گیا۔

ڈونلڈ ٹرمپ نے جھوٹا دعویٰ کیا کہ کملا ہیریس اور ڈیموکریٹس بچوں کے قتل کی حمایت کرتے ہیں۔جس پر کملا ہیرس نے کہا کہ جیسا کہ میں نے کہا تھا آپ کو جھوٹ پر جھوٹ سُننے کو ملیں گے۔صدارتی امیدواروں نے غزہ جنگ اور یوکرین پر روسی حملے کے حوالے سے بھی بات چیت کی اگرچہ دونوں میں سے کسی نے بھی واضح نہیں کیا کہ وہ تنازع کو کیسے ختم کرنے کی کوشش کریں گے۔کملا ہیریس نے ٹرمپ پر الزام لگایا کہ وہ روسی صدر ولادیمیر پیوٹن کی حمایت کے لیے یوکرین کے لیے امریکی حمایت ختم کرنا چاہتے ہیں جبکہ سابق صدر ڈونلڈ ٹرمپ نے دعویٰ کیا کہ کملا ہیرس اسرائیل سےنفرت کرتی ہیں تاہم کملا ہیرس نے اس دعوے کو مسترد کر دیا۔