آئینی اصلاحات سے متعلق خصوصی پارلیمانی کمیٹی میں مزید 12 ارکان شامل

سینیٹ کے تمام ایک درجن پارلیمانی لیڈرز کو کمیٹی کا حصہ بنا دیا گیا، نوٹیفکیشن جاری

اتوار 15 ستمبر 2024 21:10

آئینی اصلاحات سے متعلق خصوصی پارلیمانی کمیٹی میں مزید 12 ارکان شامل

اسلام آباد (اُردو پوائنٹ اخبارتازہ ترین - این این آئی۔ 15 ستمبر2024ء) آئینی اصلاحات سے متعلق پارلیمنٹ کی خصوصی کمیٹی میں مزید 12 ارکان کو شامل کرتے ہوئے ایوان بالا سینیٹ کے تمام ایک درجن پارلیمانی لیڈرز کو کمیٹی کا حصہ بنا دیا گیا۔میڈیا رپورٹ کے مطابق آئینی اصلاحات سے متعلق پارلیمنٹ کی خصوصی کمیٹی میں توسیع کر دی گئی، سینیٹ سیکریٹریٹ سے جاری نوٹی فکیشن کے مطابق مزید 12 ارکان کو کمیٹی کا حصہ بنایا گیا ہے۔

رپورٹ کے مطابق سینیٹ کے 12 پارلیمانی لیڈر کمیٹی کے ارکان میں شامل کیے گئے ہیں ، اپوزیشن لیڈر بھی کمیٹی کا حصہ ہوں گے۔کمیٹی میں شامل کیے گئے اراکین میں پاکستان پیپلز پارٹی سے تعلق رکھنے والی سینیٹر شیری رحمن، مسلم لیگ (ن) کے عرفان صدیقی، پی ٹی آئی سے علی ظفر، بلوچستان عوامی پارٹی (بی اے پی) سے منظور احمد، جمعیت علمائے اسلام (جے یو آئی ف) سے مولانا عطا الرحمن، عوامی نیشنل پارٹی (اے این پی) سے ایمل ولی کو کمیٹی میں شامل کیا گیا ہے۔

(جاری ہے)

ان کے علاوہ متحدہ قومی موومنٹ پاکستان (ایم کیو ایم پاکستان) سے فیصل سبزواری، بلوچستان نیشنل پارٹی (بی این پی) سے محمد قاسم، مجلس وحدت مسلمین (ایم ڈبلیو ایم) سے راجا ناصر عباس، نیشنل پارٹی سے جان محمد، مسلم لیگ (ق) کامل علی آغا اور سنی اتحاد کونسل سے حامد خان کمیٹی کے رکن ہوں گے۔