وزیراعلیٰ خیبرپختونخواہ کی مبینہ گمشدگی پر وکلاء کا پشاور ہائیکورٹ سے رجوع

امید ہے چیف جسٹس آج کے لیے خصوصی بنچ تشکیل دیدیں گے کیوں کہ وزیراعلیٰ علی امین گنڈا پور کی گرفتاری سے انتظامی امور متاثر ہورہے ہیں۔ ایڈووکیٹ جنرل شاہ فیصل اتمانخیل کی میڈیا سے گفتگو

ساجد علی اتوار 6 اکتوبر 2024 16:02

وزیراعلیٰ خیبرپختونخواہ کی مبینہ گمشدگی پر وکلاء کا پشاور ہائیکورٹ ..

پشاور ( اُردو پوائنٹ اخبارتازہ ترین۔ 06 اکتوبر 2024ء ) وزیراعلیٰ خیبرپختونخواہ علی امین گنڈا پور کی مبینہ گمشدگی پر وکلاء نے پشاور ہائیکورٹ سے رجوع کرلیا۔ تفصیلات کے مطابق وزیراعلیٰ علی امین گنڈا پور کی خیبرپختونخواہ ہاؤس اسلام آباد سے مبینہ گمشدگی کے معاملے پر انصاف لائرز فورم نے چیف جسٹس پشاور ہائی کورٹ سے رابطہ کیا ہے، ایڈووکیٹ جنرل شاہ فیصل اتمانخیل کے ذریعے چیف جسٹس سے رابطہ کیا گیا۔

ایڈووکیٹ جنرل شاہ فیصل اتمانخیل نے میڈیا سے گفتگو میں بتایا کہ رجسٹرار پشاور ہائیکورٹ سے رابطہ ہوا ہے، چیف جسٹس سے آج درخواست پر سماعت کی درخواست کی ہے۔ امید ہے چیف جسٹس آج کے لیے خصوصی بنچ تشکیل دیدیں گے کیوں کہ وزیراعلیٰ علی امین گنڈا پور کی گرفتاری سے انتظامی امور متاثر ہورہے ہیں۔

(جاری ہے)

ادھر خیبرپختونخواہ حکومت نے وفاقی وزیرداخلہ محسن نقوی کو وزیراعلیٰ علی امین گنڈاپور کی جبری گمشدگی کا براہ راست ذمہ دار قرار دے دیا، وزیرداخلہ کی پریس کانفرنس پر ردعمل دیتے ہوئے صوبائی حکومت کے مشیراطلاعات بیرسٹر ڈاکٹر سیف نے کہا کہ محسن نقوی اور فیصل کریم کنڈی نے میڈیا کے سامنے کمال کی اداکاری کی، گورنر فیصل کریم کنڈی پرائے کی شادی میں عبداللہ دیوانے بنے ہوئے ہیں، ملک کے وزیر داخلہ ہونے کے ناطے محسن نقوی کی وزیر اعلی خیبر پختون خوا کی گمشدگی بارے لا علمی ڈرامہ بازی کے سوا کچھ نہیں۔

انہوں نے کہا کہ وزیراعلی کی جبری گمشدگی کا براہ راست ذمہ دار وزیر داخلہ محسن نقوی ہے، کے پی ہاوس میں توڑ پھوڑ واضح ثبوت ہے کہ وزیراعلی کو زبردستی حراست میں لیا گیا، کے پی ہاؤس میں بھاری اکثریت سے منتخب وزیراعلی پر حملہ فیڈریشن پر حملہ ہے، کے پی ہاؤس میں کی گئی تھوڑ پھوڑ کی مرمت نہیں کی جائے گی بلکہ تاریخ کے طالب علموں کے لیے محفوظ کیا جائے گا، ٹوٹی پھوٹی کھڑکیاں اور دروازے جمہوریت اور فیڈریشن کے منہ پر طمانچہ ہے۔

بیرسٹر ڈاکٹر سیف کہتے ہیں کہ جعلی حکومت کی یہ مذموم حرکت جمہوریت اور فیڈریشن پر سیاہ دھبے کے طور پر تاریخ میں یاد رکھا جائے گا، وزیر اعلی کی جبری گمشدگی سے شنگھائی تعاون تنظیم کے غیر ملکی مہمانوں کو کیا پیغام ملے گا؟ غیر ملکی مہمان کیا سوچیں گے کہ پاکستان میں کیسی جمہوریت ہے، شنگھائی تعاون تنظیم کو پی ٹی ائی احتجاج سے جوڑنے والے اپنے اوچھے ہتھکنڈوں پر غیر ملکی مہمانوں کو کیا جواب دیں گے۔

صوبائی مشیر اطلاعات نے بتایا کہ جعلی وفاقی حکومت کے اوچھے ہتھکنڈوں بارے آج خیبر پختونخواہ اسمبلی کا اجلاس بھی بلایا گیا ہے، صوبائی حکومت ایڈوکیٹ جنرل کے توسط سے عدالتی کاروائی کے لیے بھی اقدامات کررہی ہے، اسمبلی اجلاس میں وزیراعلیٰ کی جبری گمشدگی اور کے پی ہاوس تھوڑ پھوڑ بارے بحث کی جائے گی، منتخب وزیراعلی کی جبری گمشدگی پختون خوا کے لوگوں کی مینڈیٹ کی توہین ہے، اسمبلی اجلاس میں وزیراعلیٰ کی جبری گمشدگی اور جعلی حکومت کے غیر جمہوری اور فسطائیت کے خلاف لائحہ عمل مرتب کیا جائے گا۔