بھارتی نژاد برطانوی شہری خاتون عائشہ وقارکا نام فارن کنٹرول لسٹ سے نکالنے کی درخواست پر فریقین سے جواب طلب

پیر 14 اکتوبر 2024 15:47

لاہور (اُردو پوائنٹ اخبارتازہ ترین - اے پی پی۔ 14 اکتوبر2024ء) لاہور ہائیکورٹ نے بھارتی نژاد برطانوی شہری خاتون عائشہ وقار کا نام فارن کنٹرول لسٹ سے نکالنے کی درخواست پر فریقین کو نوٹس جاری کرتے ہوئے جواب طلب کر لیا۔ جسٹس شجاعت علی نے سوموار کو کیس کی سماعت کی جس میں وفاقی حکومت، وزارت داخلہ اور ایف آئی اے کو فریق بنایا گیا ہے۔ درخواست گزار کی طرف سے وکیل شہرام ساقی پیش ہوئے اور موقف اختیار کیا کہ عائشہ وقار برطانیہ میں پیدا ہوئیں اور انہوں نے کبھی بھارت کا سفر نہیں کیا، ان کے نام کو انڈین نیشنل ہونے کی وجہ سے فارن کنٹرول لسٹ میں شامل کیا گیا ہے، درخواست گزار نے اسلام قبول کرتے ہوئے پاکستانی شہری وقار سے شادی کی اور ان کا برتھ سرٹیفکیٹ اور نکاح نامہ عدالت میں پیش کر دیا گیا ہے،اس سے قبل بھی عائشہ وقار کو بیرون ملک جانے کی اجازت دی گئی تھی۔

(جاری ہے)

وکیل نے عدالت کو بتایا کہ پہلے ان کا نام ایگزٹ کنٹرول لسٹ میں شامل کیا گیا تھا، مگر اب اسے نکال کر فارن کنٹرول لسٹ میں ڈال دیا گیا ہے جس کی وجہ سے وہ بیرون ملک سفر نہیں کر سکتیں،استدعا ہے کہ عدالت ان کا نام فارن کنٹرول لسٹ سے نکالنے کا حکم دے۔عدالت نے سماعت کے بعد وفاقی حکومت، وزارت داخلہ اور ایف آئی اے کو نوٹس جاری کرتے ہوئے جواب طلب کر لیا اور کیس کی سماعت کو دو ہفتوں کے لیے ملتوی کر دیا۔