کےالیکٹرک کے ستمبرکے ماہانہ ایف سی اے کی مد میں 247 ملین ریلیف کی درخواست پر نیپرا کی عوامی سماعت مکمل

جمعرات 31 اکتوبر 2024 19:20

اسلام آباد (اُردو پوائنٹ اخبارتازہ ترین - اے پی پی۔ 31 اکتوبر2024ء) نیشنل الیکٹرک پاور ریگولیٹری اتھارٹی (نیپرا) نے کے الیکٹرک کی جانب سے ستمبر 2024 کے ماہانہ فیول چارج ایڈجسٹمنٹ (ایف سی اے) کے حوالے سے جمع کرائی گئی درخواست پر عوامی سماعت مکمل کر لی۔ترجمان کے الیکٹرک کی جانب سے بدھ کو جاری بیان کے مطابق صارفین کیلئے تجویز کردہ ایف سی اے ریلیف 247 ملین ہے جو 16 پیسے فی یونٹ ہو گا۔

(جاری ہے)

عوامی سماعت کے بعد نیپرا تفصیلی فیصلہ جاری کرے گا جس میں یہ واضح کیا جائے گا کہ ایف سی اے کی رقم کو صارفین کے بلوں میں منتقل کب کیا جائے گا اور اس کی مدت کیا ہوگی۔فیول چارج ایڈجسٹمنٹ کا انحصار بجلی پیدا کرنے کے لیے استعمال ہونے والے ایندھن کی عالمی منڈی میں قیمتوں میں اُتار چڑھاؤ اور جنریشن مکس میں ہونے والی تبدیلیوں پر ہوتا ہے، یہ اخراجات نیپرا کی جانچ پڑتال اور منظوری کے بعد صارفین کے بلوں میں ظاہر ہوتے ہیں۔ جب ایندھن کی عالمی قیمتیں کم ہوتی ہیں تو صارفین اپنے بلوں میں کمی سے بھی فائدہ اٹھاتے ہیں۔ صارفین کے بلوں پر چارج کیے جانے والے نرخوں کا تعین نیپرا کرتا ہے اور وفاقی حکومت کی طرف سے مطلع کیا جاتا ہے۔