Live Updates

بھارتی ٹیم کا دورہ پاکستان مودی سرکار کی منظوری پر منحصر ہے : نجم سیٹھی

دونوں ملکوں کے لوگ پاک بھارت مقابلے چاہتے ہیں، بی سی سی آئی کا مسئلہ نہیں، مسئلہ بھارت حکومت کا ہے : سابق چیئرمین پی سی بی

ذیشان مہتاب جمعرات 14 نومبر 2024 10:27

بھارتی ٹیم کا دورہ پاکستان مودی سرکار کی منظوری پر منحصر ہے : نجم سیٹھی

لاہور (اردو پوائنٹ تازہ ترین اخبار ۔ 14 نومبر 2024ء ) سینئر صحافی اور سابق چیئرمین پی سی بی نجم سیٹھی نے چیمپئنز ٹرافی کے معاملے پر گفتگو کرتے ہوئے کہا کہ بھارتی حکومت اجازت دے تو انڈین ٹیم فوری آئے گی، پی سی بی اور بی سی سی آئی اس معاملےمیں کچھ نہیں کرسکتے، چیمپئنز ٹرافی کا معاملہ حکومتوں کے ہاتھ میں ہے۔

نجی ٹی وی سماء نیوز کے مطابق نجم سیٹھی کا کہنا تھا کہ دونوں ملکوں کے لوگ پاک بھارت مقابلے چاہتے ہیں، پاکستان کئی بارکرکٹ کھیلنے بھارت جاچکا ہے ، آئی سی سی کلیئر ہے اگر ایک ملک ایونٹ نہیں کرا سکتا تو اسے شفٹ کیا جا سکتا ہے، جے شاہ سے کویت اور تھائی لینڈ میں تفصیلی گفتگو ہوئی، آئی سی سی کو بی سی سی آئی سمجھا جائے۔

سابق چیئرمین پی سی بی نے کہا کہ جے شنکر سے ملاقات کی درخواست کی، انہوں نےملاقات کی، جب جے شنکر نئے وزیر بنے تھے، اُس وقت میں دلی میں تھا، ایک بار جنرل باجوہ پھر عمران خان نے تجارتی تعلقات بحال کرنے کی بات کی، میں نہیں جانتا پاکستان اور بھارتی حکومت کی کوئی بات چیت شروع ہوئی کہ نہیں۔

(جاری ہے)

ان کا کہنا تھا کہ بی سی سی آئی کا مسئلہ نہیں، مسئلہ بھارت حکومت کا ہے، اُس وقت میں نے ہائبرڈ ماڈل تجویز کیا تھا، سری لنکا چاہتا تھا کہ ایونٹ پاکستان سے ہٹا کر وہاں منتقل کیا جائے، ماضی میں اے سی سی نے کہا تھا اگر بھارت پاکستان نہیں آتا توسری لنکا کو شامل کر لیتے ہیں۔

نجم سیٹھی کا کہنا تھا کہ چیمپئنز ٹرافی کا معاملہ پاک بھارت بورڈ کے ہاتھ میں نہیں، بھارتی حکومت کرکت ٹیم کو کھیلنے نہیں دے رہی، 2015ء میں بھارت سے سیریز کھیلنے کا معاہدہ کیا تھا، بھارت سیریز کے معاہدے سے مُکر گیا ، بھارت کو عالمی ثالثی عدالت میں لے گئے، ہمارا کیس مضبوط ہونے کے باوجود فیصلہ ہمارے خلاف آیا۔