اردنی نژاد جولیا کی وائٹ ہاس تک رسائی، شوہر ٹرمپ کے مشیر ہوں گے

ْجولیا النشیوات نے سابق صدور جارج ڈبلیو بش اور اوباما کی انتظامیہ میں بھی کام کیاہے،رپورٹ

اتوار 17 نومبر 2024 11:20

واشنگٹن (اُردو پوائنٹ اخبارتازہ ترین - این این آئی۔ 17 نومبر2024ء) نومنتخب امریکی صدر ڈونلڈ ٹرمپ کی جانب سے مائیک والٹز کو اپنا قومی سلامتی کا مشیر منتخب کیا گیا تو اس کے بعد ان کی اہلیہ جولیا النشیوات جو اردنی نژاد ہیں کا نام بھی میڈیا میں سامنے آگیا۔غیرملکی خبررساں ادارے کے مطابق جولیا النشیوات ایک امریکی ماہر تعلیم اور سابق سرکاری عہدیدار ہیں۔

انہوں نے 2020 سے 2021 تک ٹرمپ انتظامیہ میں ہوم لینڈ سکیورٹی کے دسویں مشیر کے طور پر کام کیا تھا۔جولیا النشیوات نے سابق صدور جارج ڈبلیو بش اور براک اوباما کی انتظامیہ میں بھی کام کیا۔ وہ اردنی عیسائی تارکین وطن والدین کی بیٹی ہے۔ وہ 1975 میں کارمل نیو یارک میں پیدا ہوئی تھی اور فلوریڈا کے علاقے اماتیلا میں ان کی پرورش ہوئی۔

(جاری ہے)

49 سالہ جولیا النشیوات نے سٹیٹسن یونیورسٹی سے بیچلر آف آرٹس کی ڈگری، جارج ٹان یونیورسٹی سے ماسٹر آف آرٹس کی ڈگری لی اور ٹوکیو انسٹی ٹیوٹ آف ٹیکنالوجی سے پی ایچ ڈی کی ہے۔

1997 میں اپنے کمیشن کے بعد جولیا النشیوات نے امریکی فوج میں ملٹری انٹیلی جنس آفیسر کے طور پر کام کیا اور کیپٹن کے عہدے کے ساتھ فوج چھوڑ دی۔ انہوں نے لگاتار مشن انجام دیے جس کے لیے انھیں آپریشن اینڈورنگ عراقی فریڈم کی حمایت میں برونز سٹار میڈل سے نوازا گیا۔ بعد میں جولیا نے وائٹ ہاس کی کمیٹی میں نیشنل انٹیلی جنس کے ڈائریکٹر کے دفتر میں اور بش جونیئر، اوباما اور ٹرمپ انتظامیہ کے دوران محکمہ خارجہ میں کئی سینئر اقتصادی اور قومی سلامتی کے کرداروں میں کام کیا۔

اس سے قبل وہ فلوریڈا میں سابق امریکی وزیر خارجہ ریکس ٹلرسن کے لیے نائب وزیر خارجہ کے عہدے پر اور سابق امریکی صدر جارج ڈبلیو بش کی انتظامیہ میں نیشنل انٹیلی جنس کے ڈائریکٹر کے دفتر میں چیف آف پالیسی سٹاف کے عہدے پر فائز تھیں۔ قومی سلامتی کے مشیر کا عہدہ، جس پر ان کے شوہر والٹز فائز ہوں گے، امریکہ میں ایک طاقتور عہدہ ہے جس پر تعیناتی کے لیے سینیٹ کی منظوری کی ضرورت نہیں ہے۔

اس عہدے پر والٹز قومی سلامتی سے متعلق اہم امور سے آگاہ کرنے اور مختلف ایجنسیوں کے ساتھ رابطہ کاری کے لیے ذمہ دار ہوں گے۔ والٹز کو ٹرمپ کا وفادار سمجھا جاتا ہے اور وہ امریکی فوج کی سپیشل فورسز سے ریٹائرڈ افسر ہے۔ وہاں انہوں نے 24 سال خدمات انجام دیں۔ انہوں نے نیشنل گارڈ میں بھی کرنل کے عہدے پر خدمات انجام دی ہیں۔