علامہ خادم حسین رضوی کی دوسری برسی کی تین روزہ تقریبات شروع

منگل 19 نومبر 2024 20:40

لاہور (اُردو پوائنٹ اخبارتازہ ترین - این این آئی۔ 19 نومبر2024ء) بانی تحریک لبیک پاکستان علامہ حافظ خادم حسین رضوی کی چوتھی برسی کے سلسلہ میں تین روزہ تقریبات کا جامع مسجد رحمتہ للعالمین مین ملتان روڈپر آغاز ہوگیا۔ امیر تحریک لبیک پاکستان حافظ سعد حسین رضوی،صاحبزادہ انس حسین رضوی،علامہ غلام غوث بغدادی، پیر سید ظہیر الحسن شاہ، مفتی عمیر الازھری، پیر سید سرور حسین شاہ، پیر سیدعنائیت الحق شاہ سلطانپوری،علامہ غلام عباس فیضی، مفتی وزیر احمد رضوی نے علامہ خادم حسین رضوی کے مزار پرچادرپوشی کی۔

چادر پوشی کے بعد نائب امیر تحریک لبیک پاکستان پیر سید ظہیر الحسن شاہ نے خصوصی دعا کروائی۔تقریب میں اندرون اور بیرون ملک سے کارکنان کی بڑی تعداد شرکت کررہی ہے ۔

(جاری ہے)

کارکنان مزار علامہ حافظ خادم حسین رضوی پرحاضری، فاتحہ خوانی اور پھول نچھاور کرتے رہے۔اس موقع پر زائرین ملک و قوم کی سلامتی کی اور حضور کا دین تخت پر لانے کی دعائیں مانگتے رہے۔

تقریبات کے لئے ٹی ایل پی رضاکاروں کی طرف سے سکیورٹی کے انتہائی سخت انتظامات کیے گئے ہیں۔داخلی گیٹوں پر واک تھرو گیٹ لگا کر کارکنان کو چیکنگ کے بعد پنڈال میں جانے کی اجازت دی جارہی ہے۔آج (بدھ ) دوسرے روز اندرون و بیرون ملک سے علمائے کرام، مشائخ عظام،سجادہ نشین، مذہبی اسکالرز بھی شرکت کریں گے۔تقریبات 21نومبر بروز جمعرات تک جاری رہیں گی۔آج 20نومبر بروزبدھ دوسرے دن کی پہلی نشست میں تنظیمی ذمہ داران خطاب کرینگے جبکہ دوسری نشست بعداز نماز عشا شروع ہو گی جس میں علما و مشائخ،مذہبی اسکالرز و دیگر خطابات کریں گے۔