مخدوم امین فہیم کی پارٹی، جمہوریت اور ملک کیلئے خدمات ناقابلِ فراموش ہیں،بلاول بھٹوزرداری

بدھ 20 نومبر 2024 22:20

کراچی (اُردو پوائنٹ اخبارتازہ ترین - اے پی پی۔ 20 نومبر2024ء) پاکستان پیپلز پارٹی کے چیئرمین بلاول بھٹو زرداری نے مخدوم امین فہیم مرحوم کو ان کی 9ویں برسی کے موقع پر خراج عقیدت پیش کرتے ہوئے کہا ہے کہ پارٹی، جمہوریت اور ملک کے لیے ان کی خدمات ناقابلِ فراموش ہیں۔

(جاری ہے)

میڈیا سیل بلاول ہاؤس کی جانب سے جاری بیان کے مطابق پی پی پی چیئرمین نے مشکل ترین ادوار خاص طور پر آمرانہ حکومتوں کے خلاف جدوجہد کے دوران مخدوم امین فہیم کی پارٹی سے غیر متزلزل وابستگی کو سراہا ۔

انہوں نے کہا کہ مخدوم امین فہیم ثابت قدمی اور بہادری کی علامت تھے۔ وہ شہید ذوالفقار علی بھٹو اور شہید محترمہ بینظیر بھٹو کے شانہ بشانہ کھڑے رہے اور پی پی پی کے ترقی پسند، جامع اور جمہوری پاکستان کے وژن کو آگے بڑھانے میں کلیدی کردار ادا کیا۔انہوں نے مخدوم امین فہیم کی روح کے ایصال ثواب کے لیے دعا کی اور ان کی خدمات کو خراج تحسین پیش کرتے ہوئے کہا کہ وہ پارٹی اور قوم کے لیے ایک روشن مثال ہیں۔