گوجرخان، جی ٹی روڈ پرغیر ضروری یوٹرن اورغلط اطراف گزرنے کے سبب متعدد نوجوان روڈ ایکسیڈنٹ سے اپنی قیمتی جانیں گنوا بیٹھے

ہفتہ 23 نومبر 2024 17:21

گوجرخان(اُردو پوائنٹ اخبارتازہ ترین - این این آئی۔ 23 نومبر2024ء) شہر میں جی ٹی روڈ پر غیر ضروری یوٹرن اور غلط اطراف گزرنے کے سبب پچھلے کچھ عرصے سے متعدد نوجوان روڈ ایکسیڈنٹ سے اپنی قیمتی جانیں گنوا بیٹھے ابھی چند دن قبل بھی دو نوجوان انہی یوٹرن میں سے ایک پر ایکسیڈنٹ سے جاںبحق ہو گئے تھے شہر کی سیاسی سماجی شخصیات و تاجر برادری کی طرف سے بھی شہر میں حالیہ رونما ہونے والے حادثات و قیمتی جانوں کے ضیاع پر رنج وغم کا اظہار کیا ہے۔

اس تمام صورتحال پر مقامی صحافیوں نے نیشنل ہائی ویز اتھارٹی موٹر وے پولیس کیساتھ ساتھ اسسٹنٹ کمشنر گوجر خان کو درپیش صورتحال پر باہمی مشاورت سے لائحہ عمل مرتب کرنے پر بات کی، جس پر دونوں بڑے اداروں این ایچ اے و موٹر وے پولیس میں رابطوں و اسسٹنٹ کمشنر گوجر خان سے مشاورت کے عمل کا آغاز ہو چکا ۔

(جاری ہے)

ہے ڈی ایس پی موٹر وے پولیس نے میڈیا سے گفتگو کرتے ہوئے کہا کہ ہم نے این ایچ اے کو بذریعہ خطوط انکے بنائے یوٹرنوں کے مقامات کو بدلنے و قومی شاہراہ کے درمیان لگے لوہے کے جنگلوں کی مرمت کا کہا ہے شہر میں جی ٹی روڈ پر حادثات کا سبب بننے والے غیر مناسب مقام پر بنے یو ٹرن ہیں وہاں نوجوانوں کا ہائی ویز اتھارٹی کے بنائے قوانین کو نظر انداز کرنا بھی شامل ہے گزشتہ چند دن قبل ہونے والے حادثات میں قومی شاہراہ پر غلط اطراف سے سفر وغیر ضروری مقامات پر بنائے یو ٹرن بھی ہیں موٹر وے پولیس اپنے تمام وسائل بروئے کار لا رہی ہے سفر کو بہتر و محفوظ بنانے میں مقامی کمیونٹی کو متحرک ہونا چاہیے قومی شاہراہ پر سفر کو محفوظ بنانے کے لئے آگاہی مہم کا انعقاد ضروری ہے ۔

اسسٹنٹ کمشنر گوجر خان نے این این آئی سے گفتگو میں کہا کہ مقامی کمیونٹی کی مشاورت سے شہر میں حادثات پر قابو پانے کے لئے ایک پلان مرتب کیا ہے جیسے این ایچ اے سے شئیر کیا جائے گا تاکہ اس پر عمل کر کے انسانی زندگیوں کے تحفظ کو یقینی بنائیں۔