فائنل کہاں ہوگا؟ بھارت نے نئے ’’پارٹنر شپ یا فیوژن فارمولے‘‘ پر بھی اعتراض جڑ دیا

اگر معاملات جمعرات تک حل نہ ہوئے تو اسے رائٹس ہولڈرز کی جانب سے سخت سوالات کا سامنا ہوگا

ذیشان مہتاب پیر 2 دسمبر 2024 11:33

فائنل کہاں ہوگا؟ بھارت نے نئے ’’پارٹنر شپ یا فیوژن فارمولے‘‘ پر بھی ..

لاہور (اردو پوائنٹ تازہ ترین اخبار ۔ 2 دسمبر 2024ء ) فائنل کہاں ہوگا؟ بھارت نے نئے ’’پارٹنر شپ یا فیوڑن فارمولے‘‘ پر بھی اعتراض جڑ دیا، کوالیفائی کرنے کی صورت میں چیمپئنز ٹرافی کے فیصلہ کن معرکے کیلئے بھی پاکستان جانے سے انکار سامنے آگیا،پی سی بی نے بھی دو ٹوک جواب دیتے ہوئے کہا کہ اگر ایسا ہے تو ہماری ٹیم سے بھی کسی فائنل کیلیے دورے کی امید نہ رکھی جائے، 3 سال کے تمام فائنلز بھی دبئی میں ہونے چاہیئں، اس کا تاحال کوئی جواب نہیں آیا۔

معاملے میں نیا ڈیڈ لاک سامنے آ گیا، بی سی سی آئی تاخیری حربے استعمال کر رہا ہے۔

تفصیلات کے مطابق طویل عرصے بعد پاکستان کو آئندہ سال کے اوائل میں کسی آئی سی سی ایونٹ کی میزبانی کرنا ہے، چیمپئنز ٹرافی کی تیاریاں درست سمت میں گامزن تھیں کہ اچانک بھارت نے دورہ نہ کرنے کا اعلان کرکے معاملات پیچیدہ بنا دیے۔

(جاری ہے)

گذشتہ دنوں دبئی میں پی سی بی حکام کی آئی سی سی کے ٹاپ آفیشلز سے ملاقات ہوئی، چیئرمین محسن نقوی نے ویڈیو کال پر جے شاہ سے بھی بات کی ، پاکستانی بورڈ نے برابری کی سطح پر بات کرتے ہوئے ’’پارٹنر شپ یا فیوڑن فارمولہ‘‘ سامنے رکھا جس کے تحت آئندہ 3 برس میں دونوں ممالک جتنے بھی آئی سی سی ایونٹس کی میزبانی کریں ان کی ٹیمیں اپنے میچز تیسرے ملک دبئی میں کھیلیں گی۔

ماضی میں ’’بگ تھری‘‘ کے حوالے سے حمایت لینے کیلیے بی سی سی آئی نے پی سی بی کو سہانے خواب دکھائے تھے، اس وقت کے بورڈ چیف نجم سیٹھی جب وطن واپس آئے تو انھوں نے کئی ’’خوشخبریوں‘‘ کا دعویٰ کیا لیکن لیٹر پیڈ پر لکھی باتوں کو بعد میں بی سی سی آئی نے ماننے سے انکار کر دیا اور کوئی باہمی سیریز نہ ہو سکی۔ اس لیے پاکستان اب محتاط ہے اور آئی سی سی کو ساتھ رکھ کر کوئی معاہدہ چاہتا ہے، ابتدا میں بی سی سی آئی نے دلچسپی دکھائی لیکن اب معاملہ تاخیر کا شکار ہے۔

گذشتہ روز اتوار کی چھٹی کا جواز بنا کر کوئی جواب نہ دیا گیا، اب پیر اور منگل کو یو اے ای میں تعطیل اورکونسل کے دفاتر بند ہونے کا جواز دیا جا رہا ہے۔ جے شاہ کی بطور آئی سی سی چیئرمین نئی اننگز گذشتہ روز شروع ہو چکی، پی سی بی ذرائع کے مطابق اب کوئی اور راستہ نہیں ہے، ہماری جانب سے ایک فارمولہ آ گیا جسے بھارت کو قبول کرنا چاہیے۔

ہمیں تین سال میں ایک جبکہ بھارت کو تین ٹورنامنٹس کی میزبانی کرنا ہے، ہم ہمیشہ کیلیے اس مسئلے کو ختم کرنا چاہتے ہیں، بھارتی ٹیم کو نہیں آنا تو نہ آئے لیکن پھر ہم سے بھی وہاں جانے کی توقع نہ رکھیں۔

اگر کسی میں ملک میں ایونٹ ہوا اس کی ٹیم کو فائنل کھیلنے دبئی ہی آنا ہوگا، یہ نہیں ہو سکتا کہ بھارتی ٹیم فائنل کھیلنے پاکستان نہ آئے اور پھر اپنے ٹورنامنٹ میں وہ ہم سے یہ توقع رکھیں کہ ٹیم وہاں بھیجیں گے، بھارت اس بات کو تسلیم نہیں کر رہا اور ڈیڈ لاک سا آگیا ہے۔

دوسری جانب براڈ کاسٹرز کی کانفرنس جمعرات کو دبئی میں ہو گی، اس میں آئی سی سی کو چیمپئنز ٹرافی کا شیڈول بھی شیئرکرنا ہوگا، ہر گذرتے دن کے ساتھ حکام کی بے چینی بڑھتی جا رہی ہے، اگر معاملات اس وقت تک حل نہ ہوئے تو اسے رائٹس ہولڈرز کی جانب سے سخت سوالات کا سامنا ہوگا۔

یاد رہے کہ آئی سی سی نے جمعے کو دبئی میں بورڈ ڈائریکٹرز کی میٹنگ رکھی تھی جو 15منٹ سے پہلے ہی ختم ہو گئی، چیئرمین پی سی بی محسن نقوی سمیت کئی ٹاپ آفیشلز یو اے ای میں ہی موجود تھے، ان کی گذشتہ روز وطن واپسی ہوئی۔

چند روز قبل پاکستان کو ڈرانے کیلیے یہ بھی تاثر دیا گیا تھا کہ اگر ہائبرڈ ماڈل قبول نہ کیا تو گرین شرٹس کے بغیر ہی کسی اور ملک میں مکمل ایونٹ کرا دیا جائے گا، گذشتہ روز تک یہی امکان ظاہر کیا جا رہا تھا کہ معاملہ جلد حل ہو جائے گا لیکن اگراب آئندہ چند روز میں بھی ایسا نہ ہوا تو پھر ووٹنگ کے ذریعے ہی فیصلہ ہوگا۔

یہاں بھارتی بورڈ اپنا اثرورسوخ استعمال کر سکتا ہے، ویسے بھی جے شاہ اب چیئرمین آئی سی سی بن چکے ہیں، البتہ اگر پاکستان پر کوئی فیصلہ تھوپنے کی کوشش ہوئی تو پی سی بی قانونی راستہ اختیار کر سکتا ہے، اس حوالے سے چند روز قبل برطانیہ میں وکلا سے ابتدائی بات چیت بھی ہو چکی۔