چیئرمین سینیٹ سے سعودی شوریٰ کونسل کے چیئرمین کی سربراہی میں وفد کی ملاقات، دوطرفہ تعلقات پر گفتگو

اسلام آباد (اُردو پوائنٹ اخبارتازہ ترین - این این آئی۔ 18 دسمبر2024ء)چیئرمین سینٹ سید یوسف رضا گیلانی نے کہا ہے کہ سعودی وفد کا دورہ دونوں ملکوں کے تعلقات میں ایک نیا سنگ میل ثابت ہوگا، برادرانہ تعلقات کو مشترکہ مفاد کے شعبوں میں توسیع دینا وقت کی اہم ضرورت ہے ، تجارت، سرمایہ کاری، دفاع، توانائی، تعلیم اور دیگر شعبوں میں معاونت کاری میں پیشرفت خوش آئند ہے، اقتصادی اور سرمایہ کاری تعاون کو بڑھانے کے لئے مواقع سے استفادہ کرنا ہوگا۔

سینیٹ سیکرٹریٹ کے مطابق ان خیالات کا اظہار انہوں نے سعودی شوریٰ کونسل کے چیئرمین ڈاکٹر عبداللہ بن محمد بن ابراہیم الشیخ سے ملاقات میں کیا جنہوں نے بدھ کو یہاں وفد کے ہمراہ ان سے ملاقات کی۔ چیئرمین سینیٹ نے سعودی وفدکو خوش آمدید کہتے ہوئے کہا کہ چیئرمین سعودی شوریٰ کونسل پاکستان کے دوست ہیں اور ان کا یہ دورہ دونوں ملکوں کے تعلقات میں ایک نیا سنگ میل ثابت ہوگا۔

(جاری ہے)

انہوں نے کہا کہ پاکستان اور سعودی عرب کے مابین ادارہ جاتی تعلقات ایک نئے دور میں داخل ہو گئے ہیں، شہزادہ محمد بن سلمان پاکستان کے سچے دوست ہیں، ہر مرحلے پر پاکستان کی حمایت کی ہے۔ ملاقات میں چیئرمین سینیٹ نے اپنے دورہ سعودی عرب کا ذکر تے ہوئے کہا کہ سعودی عرب میں سعودی قیادت کے ساتھ ملاقاتیں انتہائی مفید رہیں اور مستقبل میں تعلقات کو مزید فروغ ملے گا۔

انہوں نے کہا کہ پاکستانی عوام کے دل میں سعودی عرب کے لئے محبت اور احترام کے جذبات ہیں،مقدس مقامات تاریخی، ثقافتی اور مذہبی مماثلتیں دونوں ملکوں کے عوام کو آپس میں جڑے ہوئے ہیں۔ چیئرمین سینیٹ نے کہا کہ برادرانہ تعلقات کو مشترکہ مفاد کے شعبوں میں توسیع دینا وقت کی اہم ضرورت ہے، دونوں ملکوں نے مشکل وقت میں ایک دوسرے کا ساتھ دیا ہے،احترام اور باہمی اعتماد کا جذبہ مضبوط دوستی کے لئے بنیاد فراہم کرتا ہے، ہمارے دو طرفہ تعلقات کثیر الجہتی نوعیت کے ہیں۔

سید یوسف رضا گیلانی نے مزید کہا کہ تجارت، سرمایہ کاری، دفاع، توانائی، تعلیم اور دیگر شعبوں میں معاونت کاری میں پیشرفت خوش آئند ہے، ایوان بالا اور شوریٰ کونسل کے درمیان رابطوں کو مزید بڑھانے کی ضرورت ہے۔ انہوں نے کہا کہ پاکستان سعودی عرب کے تجربات سے استفادہ کرنے کا خواہاں ہے۔چیئرمین سینیٹ نے وفد کو بتایا کہ 2008اور 2011میں سعودی عرب کا دورہ کیا تھا ،اس وقت بھی اعلیٰ قیادت سے ملاقاتیں ہوئیں۔

انہوں نے کہا کہ ان تعلقات پر ہمیں فخر ہے۔ چیئرمین سینیٹ نے کہا کہ اقتصادی اور سرمایہ کاری تعاون کو بڑھانے کے لئے مواقع سے استفادہ کرنا ہوگا، تجارتی روابط مثبت سمت میں ہیں، مزید فروغ دینے کی وسیع گنجائش موجود ہے۔ سعودی تجارتی و کاروباری وفود کی پاکستان میں سرمایہ کاری کے جذبے کی قدر کرتے ہیں۔انہوں نے ایس آئی ایف سی کے بارے میں سعودی وفد کو آگاہ کیا اور کہا کہ پاکستان سعودی عرب کے ساتھ دو طرفہ تعاون، تعلقات کو قدر کی نگاہ سے دیکھتا ہے اور وفود کے تبادلوں سے تعلقات کو مزید تقویت ملے گی،اعلیٰ سطحی وفود کے تبادلے دونوں ملکوں کے درمیان بہترین تعلقات کی عکاس ہیں۔

سعودی وفد کے رہنما نے کہا کہ میرے لئے یہ خوشی کی بات ہے کہ میں پاکستان کو دورہ کر رہا ہوں ،پاکستان ہمارا مخلص دوست ہے۔انہوں نے چیئرمین سینیٹ کو بتایا کہ ان کی شوریٰ کونسل کے اراکین سید یوسف رضا گیلانی کی شخصیت سے بہت متاثر ہوئے ہیں۔انہوں نے اس امید کا اظہار کیا کہ اعلیٰ سطح وفود کے تبادلوں سے دوستی مزید مستحکم ہوگی اور ادارہ جاتی روابط کو مزید تقویت ملے گی۔ملاقات میں چیئرمین سینیٹ کے ہمراہ سینیٹرز عرفان الحق صدیقی ،کامل علی آغا،ثمینہ ممتاز زہری ، سعدیہ عباسی ،جان محمد،مولانا عطائ الرحمن ،منظور احمد ،ارباب عمر فاروق ،سردار الحاج عمر گورگیج اور سیکرٹری سینیٹ سیدحسنین حیدر بھی موجود تھے۔