سندھ میں پانی ہمارے لیے زندگی و موت کا مسئلہ بن گیا ہے،اسداللہ بھٹو

وفاقی حکومت صوبوں کو آپس میں لڑانے اورنفرتیں پیداکرنے کی بجائے دریائے سندھ سے 6 نہریں نکالنے والے منصوبے اور این ایف سی ایوارڈ مسئلہ پرارساومشترکہ مفادات کونسل میں مل بیٹھ کرحل کریں،صدر ملی یکجہتی کونسل سندھ

منگل 24 دسمبر 2024 21:15

کراچی(اُردو پوائنٹ اخبارتازہ ترین - این این آئی۔ 24 دسمبر2024ء)ملی یکجہتی کونسل سندھ کے صدروسابق ایم این اے اسداللہ بھٹو نے مطالبہ کیاہے کہ وفاقی حکومت صوبوں کو آپس میں لڑانے اورنفرتیں پیداکرنے کی بجائے دریائے سندھ سے 6 نہریں نکالنے والے منصوبے اور این ایف سی ایوارڈ مسئلہ پرارساومشترکہ مفادات کونسل میں مل بیٹھ کرحل کریں۔سندھ میں پانی ہمارے لیے زندگی و موت کا مسئلہ بن گیا ہے۔

آباد زمینوں کے لیے پانی نہیں تو غیرآباد زمینوں کے لیے پانی پہنچانے کے لیے دریائے سندھ سے چھ نہروں کامنصوبہ عوام کو لڑائو حکومت کروکی پالیسی ہے۔این ارسا اور مشترکہ مفادات کونسل کے تحت تنازعہ کو حل کیاجائے۔صوبہ سندھ ٹیل پر ہے دریائے سندھ کے پانی پرپہلا حق بھی سندھ کا ہونا چاہئے۔

(جاری ہے)

ان خیالات کااظہار انہوں نے دریائے سندھ پر نہروں کی غیر قانونی تعمیر کیخلاف سندھ یونائیٹڈ پارٹی (ایس یو پی) کی احتجاجی بھوک ھڑتال میں شرکت کے موقع پرخطاب کرتے ہوئے کیا۔

صوبائی رہنمامولانا حزب اللہ جکھرو، امیر ضلع سکھر زبیر حفیظ شیخ بھی ان کے ساتھ موجود تھے۔دریں اثنا اسداللہ بھٹو نے ضلع کشمور میں بدامنی کے خلاف سکھرپریس کلب پرہونے والے دھرنے میں بھی شرکت اورمقامی سیاسی وسماجی رہنما آغاسیدایوب شاہ کی رہائش گاہ پہنچکران کی اہلیہ کی وفات پرتعزیت درجات بلندی اورپسماندگان کے لیے صبرجمیل کی دعا کی۔