مزار قائد پر میڈیا سے گفتگو کے دوران گورنر سندھ اور وزیراعلی سندھ کے درمیان دلچسپ جملوں کا تبادلہ

بدھ 25 دسمبر 2024 13:12

کراچی(اُردو پوائنٹ اخبارتازہ ترین - این این آئی۔ 25 دسمبر2024ء)بانی پاکستان کے یوم پیدائش پر مزار قائد پر میڈیا سے گفتگو کے دوران گورنر سندھ کامران ٹیسوری اور وزیراعلی سندھ سید مراد علی شاہ کے درمیان دلچسپ جملوں کا تبادلہ ہوا۔گورنر سندھ نے وزیراعلی سندھ کو مخاطب کرکے کہا کہ وزیر اعظم سے جب بات کریں کراچی کے لیے بھی فنڈ ریلیز کروائیں ۔

(جاری ہے)

وزیر اعلی سندھ نے جواب میں کہا کہ کراچی میرا شہر ہے اس کے جواب میں گورنر سندھ نے کہا کہ کراچی ہم سب کاہے اس دوران وزیر اعلی سندھ نے گورنرسندھ کو مخاطب کرکے کہا کہ آپ صرف کراچی کی بات کررہے ہیں آپ پورے سندھ کے گورنر ہیں ۔

وزیراعلی کے جواب پر گورنر سندھ نے مزید بات کرتے ہوئے کہا کہ میں کراچی اور پورے سندھ کا گورنر ہوں۔ اس موقع پر وزیر اعلی سندھ نے کہا کہ سندھ حکومت کی جانب سے کراچی کے لیے کے فور منصوبہ،بی آر ٹی منصوبہ سمیت بڑے بڑے پروجیکٹس پر کام جاری ہے۔