Live Updates

کرپشن پر عمران خان کی زیروٹالرنس ہے،خیبرپختونخواہ میں کوئی کرپشن نہیں ہورہی

اگرکرپشن کے ثبوت ہیں توسامنے لائے جائیں، اگرکوئی کرپشن کرتا ہے تو سخت کاروائی ہونی چاہئے، کل مولانا فضل الرحمان سے ملاقات کی کوشش کررہے ہیں، اپوزیشن کا ایک گرینڈ الائنس بنائیں گے،سابق اسپیکر اسد قیصر

ثنااللہ ناگرہ پیر 27 جنوری 2025 21:37

کرپشن پر عمران خان کی زیروٹالرنس ہے،خیبرپختونخواہ میں کوئی کرپشن نہیں ..

اسلام آباد (اردوپوائنٹ اخبار تازہ ترین۔ آئی پی اے ۔ 27 جنوری 2025ء ) مرکزی رہنماء پی ٹی آئی سابق اسپیکر اسد قیصرنے کہا ہے کہ کرپشن پر عمران خان کی زیروٹالرنس ہے، خیبرپختونخواہ میں کوئی کرپشن نہیں ہورہی، اگر کرپشن کے ثبوت ہیں توسامنے لائے جائیں، اگر کوئی کرپشن کرتا ہے تو سخت کاروائی ہونی چاہئے، کل مولانا فضل الرحمان سے ملاقات کی کوشش کررہے ہیں، اپوزیشن کا ایک گرینڈ الائنس بنائیں گے۔

انہوں نے اے آروائی نیوز کے پروگرام میں گفتگو کرتے ہوئے کہا کہ میں پارٹی کا منتخب صوبائی صدر تھا، لیکن جب اسپیکر بنا کہا گیا سرکاری اور پارٹی عہدوں کو الگ ہونا چاہیئے،میں نے ڈیڑھ سال بعد پارٹی عہدہ چھوڑ دیا تھا۔ پرویزخٹک سیکرٹری جنرل تھے انہوں نے بھی استعفیٰ دیا اوران کی جگہ جہانگیر ترین اور میری جگہ اعظم سواتی صوبائی صدر بن گئے۔

(جاری ہے)

علی امین وزیراعلیٰ رہیں گے ایسی فی الحال کوئی بات نہیں ہے، ان کی بانی پی ٹی آئی سے ملاقات بھی ہوئی ہے، اس وقت بڑے چیلنجز ہیں، میرا کوئی گروپ نہیں ہے میں عمران خان کے گروپ میں ہوں، عمران خان ہی پی ٹی آئی ہیں۔ جنید اکبر اور میرا بھائی دونوں کلاس فیلو ہیں، پشاور یونیورسٹی میں ایک ساتھ پڑھتے تھے۔ بشریٰ بی بی ایک گھریلو خاتون ہیں ان کا سیاست سے کوئی تعلق نہیں، جب صورتحال بن جاتی ہے تو پھر اپنے حق کیلئے اور شوہر کیلئے آواز اٹھانا ان کی ذمہ داری تھی۔

میرا عمران خان کے ساتھ چھوٹے اور بڑے بھائی ہے، زندگی کے 29 سال عمران خان کو دیئے ہیں۔ اسد قیصر نے کہا کہ خیبرپختونخواہ میں کوئی کرپشن نہیں ہورہی، کرپشن پر عمران خان کی زیروٹالرنس ہے، اگر کرپشن ہورہی ہے تو ثبوت سامنے لائے جائیں۔ عاطف خان کو جو نوٹس گئے ہیں وہ پرانے ہیں۔ یہ کیسز عبوری حکومت کے دور کے ہیں۔ کرپشن کے خلاف پی ٹی آئی کی سخت پوزیشن ہے، اگر کوئی کرپشن کرتا ہے تو قانون کے مطابق سخت کاروائی ہونی چاہئے۔

انہوں نے کہا کہ پارٹی کا نیا صدر اب پارٹی کے دیگر عہدوں میں بھی تبدیلی کرے گا۔ اسد قیصر نے کہا کہ مولانا فضل الرحمان سمیت ہم سب کو آئینی بالادستی کیلئے جدوجہد کرنی ہے، کل مولانا فضل الرحمان سے ملاقات کی کوشش کررہے ہیں، ہم ملک میں گرینڈ الائنس بنانے کی کوشش کررہے ہیں، ملک کو بحرانوں سے نکالنا ہے ، افغانستان کے ساتھ بھی مسائل ہیں۔