یومِ یکجہتی کشمیر اہل پاکستان اور اہلِ کشمیر کے لازوال رشتے، مذہبی، ثقافتی اور سماجی ہم آہنگی کی پہچان بن چکا ہے،چوہدری انوار الحق

مظفر آباد (اُردو پوائنٹ اخبارتازہ ترین - این این آئی۔ 04 فروری2025ء) وزیر اعظم آزادکشمیر چوہدری انوار الحق نے 5فروری یوم یکجہتی کشمیر کے موقع پر اپنے پیغام میں کہا کہ 05 فروری یومِ یکجہتی کشمیر ایک ایسا تاریخی دن ہے جو اہلِ پاکستان اور اہلِ کشمیر کے لازوال رشتے، مذہبی، ثقافتی اور سماجی ہم آہنگی کی پہچان بن چکا ہے۔ یہ دن دنیا بھر میں بسنے والے پاکستانیوں اور کشمیریوں کے اس غیر متزلزل عزم کی تجدید کرتا ہے کہ وہ اپنے مظلوم کشمیری بھائیوں کی جدوجہد آزادی میں ہر لمحہ ان کے ساتھ کھڑے ہیں۔

انہوں نے کہا کہ کشمیری عوام نے قیامِ پاکستان سے قبل ہی نظریاتی طور پر اپنا مستقبل پاکستان کے ساتھ وابستہ کر لیا تھا، اور ہمیں اس تاریخی فیصلے پر فخر ہے۔ اہلِ پاکستان نے ہر مشکل گھڑی میں کشمیریوں کا ساتھ دیا اور ان کی قربانیوں کو قدر کی نگاہ سے دیکھا۔

(جاری ہے)

آج بھی پاکستان اور آزادکشمیر کے عوام اپنے مقبوضہ کشمیر کے بھائیوں کو یقین دلاتے ہیں کہ وہ ہر سطح پر ان کی سفارتی، سیاسی اور اخلاقی حمایت جاری رکھیں گے۔

وہ وقت دور نہیں جب کشمیری عوام آزادی کی نعمت سے ہمکنار ہوں گے اور اپنے حقِ خودارادیت کو حاصل کر کے آزاد فضاؤں میں سانس لیں گے۔5اگست2019 کو بھارت کی انتہاپسند حکومت نے آر ایس ایس کے ایجنڈے پر عمل کرتے ہوئے مقبوضہ کشمیر کی خصوصی حیثیت کو ختم کر کے جو غیر قانونی اقدامات کیے، انہیں کشمیری عوام نے یکسر مسترد کر دیا ہے۔ بھارت کے جبر و استبداد کے باوجود مقبوضہ کشمیر کے عوام نے اپنے حقِ خودارادیت کی جدوجہد کو ترک نہیں کیا۔

انہوں نے کہا کہ اس موقع پر ان تمام بھائیوں، بہنوں، بیٹیوں اور بزرگوں کو خراجِ تحسین پیش کرتا ہوں جو بھارت کے ریاستی جبر کے خلاف سینہ سپر ہیں اور اپنی آزادی کی جدوجہد جاری رکھے ہوئے ہیں۔انہوں نے کہا کہ بھارت نے مقبوضہ کشمیر کو ایک فوجی چھاؤنی میں تبدیل کر دیا ہے، جہاں ظلم و بربریت کے تمام حربے آزمائے جا رہے ہیں۔ ماورائے عدالت قتل، پیلٹ گنوں کا وحشیانہ استعمال، نوجوانوں کی جبری گمشدگیاں، خواتین کی بے حرمتی، اور انسانی حقوق کی سنگین خلاف ورزیاں آج بھی جاری ہیں۔

میں عالمی برادری، اقوامِ متحدہ اور انسانی حقوق کی تنظیموں سے اپیل کرتا ہوں کہ وہ مقبوضہ کشمیر میں بھارتی جارحیت اور انسانی حقوق کی پامالیوں کا نوٹس لیں اور بھارت کو مجبور کریں کہ وہ کشمیری عوام کو ان کا بنیادی حق، حقِ خودارادیت دے۔پاکستان ہمیشہ خطے میں امن کا خواہشمند رہا ہے، جبکہ بھارت نے ہمیشہ دہشت گردی اور جارحیت کو فروغ دیا ہے۔

بھارتی حکومت کے انتہا پسندانہ اقدامات نہ صرف مقبوضہ کشمیر بلکہ پورے خطے کے امن و استحکام کے لیے خطرہ بن چکے ہیں۔ بھارت اپنے یکطرفہ اقدامات کے ذریعے اقوامِ متحدہ کی قراردادوں سے انحراف نہیں کر سکتا، اور نہ ہی کشمیریوں کے جذبہ حریت کو دبایا جا سکتا ہے۔ہم عہد کرتے ہیں کہ کشمیری عوام کی جدوجہد کو ہر سطح پر اجاگر کریں گے اور ان کی حمایت میں کسی قسم کی کوئی کسر نہیں چھوڑیں گے۔ انشاء اللہ وہ دن دور نہیں جب مقبوضہ کشمیر بھارتی تسلط سے آزاد ہوگا، اور ریاست جموں و کشمیر کا پاکستان کے ساتھ الحاق کشمیری عوام کی خواہش کے مطابق شرمندہ تعبیر ہوگا۔