صحافتی تنظیم کے بعداب اینکرز ایسوسی ایشن نے بھی پیکا ایکٹ میں ترمیم کو اسلام آباد ہائی کورٹ میں چیلنج کردیا

جمعہ 7 فروری 2025 22:07

اسلام آباد(اُردو پوائنٹ اخبارتازہ ترین - آن لائن۔ 07 فروری2025ء)صحافتی تنظیم کے بعداب اینکرز ایسوسی ایشن نے بھی پیکا ایکٹ میں ترمیم کو اسلام آباد ہائی کورٹ میں چیلنج کر دیا سینئر اینکر پرسن حامد میر ، نسیم زہرہ ، عدنان حیدر اور امیر عباس نے درخواست دائر کردی ،درخواست صدر اسلام آباد ہائی کورٹ بار ریاست علی آزاد اور عمران شفیق ایڈوکیٹ کے ذریعے دائر کی گئی،سینئیر اینکرز نے بائیو میٹرک تصدیق بھی کروالی ہے۔

(جاری ہے)

درخواست میںوفاقی حکومت کوفریق بناتے ہوئے موقف اختیار کیاگیاہے کہ پیکا ترمیمی ایکٹ آزادی صحافت پر حملہ ہے،پیکا ترمیمی ایکٹ غیرآئینی اور غیرقانونی ہے، عدالتی جائزہ لیا جائے،پی ای سی اے قانون آزادیِ اظہار پر قدغن، حکومتی کنٹرول میں اضافہ ہے،آزادی صحافت کے خلاف قانون پی ای سی اے 2025 معطل کیا جائے، پیکا ترمیمی ایکٹ 2025 آئین کے آرٹیکل 19 اور 19 اے کے خلاف ہے، پیکا ترمیمی قانون حکومتی سنسرشپ کو غیر محدود اختیارات دیتا ہے،بغیر قانونی عمل کے جعلی خبروں کو جرم قرار دینا غیرآئینی اور آزادی صحافت پر قدغن ہے،پیکا ترمیمی ایکٹ عالمی انسانی حقوق کی خلاف ورزی ہے، پیکا ترمیمی ایکٹ پاکستان میں ڈیجیٹل حقوق کی بدترین خلاف ورزی ہے، پیکا کے تحت ریگولیٹری اتھارٹی کی کوئی آئینی حیثیت نہیں۔