سعودی عرب ، دہشت گردی کے جرائم میں ملوث شہری کوسزائے موت دیدی گئی

جمعرات 13 فروری 2025 15:43

ریاض(اُردو پوائنٹ اخبارتازہ ترین - این این آئی۔ 13 فروری2025ء)سعودی وزارت داخلہ کی جانب سے جاری بیان میں ایک مجرم کی سزائے موت پر عمل کا اعلان کیا گیا ہے۔ غیرملکی خبررساں ادارے کے مطابق مجرم نے مشرقی صوبے میں دہشت گردی سے متعلق کئی جرائم کا ارتکاب کیا تھا۔ جاری بیان میں وزارت داخلہ نے بتایا کہ سعودی شہری "علی بن سلمان بن محمد آل لیف" دہشت گردی کے کئی جرائم کا مرتکب تھا۔

(جاری ہے)

ان میں دہشت گردوں کا گروہ بنا کر اس کا سرغنہ بننا اور اپنے ساتھیوں کے ساتھ سیکورٹی مراکز پر حملہ کر کے سیکورٹی اہل کاروں کو قتل کرنا شامل ہے۔ اس کے علاوہ مجرم نے دیگر دہشت گرد گروپوں کے عناصر کو اسلحے، مالی رقوم اور رابطے کے آلات کی شکل میں معاونت فراہم کی۔بیان کے مطابق سیکورٹی اداروں نے مذکورہ مجرم کو پکڑنے کے بعد اس کے ساتھ تحقیقات مکمل کیں۔ عدالتی کارروائی میں مجرم کے خلاف شواہد کی روشنی میں سزائے موت کا فیصلہ سنایا گیا۔ بعد ازاں سپریم کورٹ کی توثیق کے بعد سزا پر عمل درآمد کا شاہی فرمان جاری ہوا۔