وفاقی سرکاری ملازمین کا مطالبات کے حق میں احتجاج، سیکرٹریٹ کے دونوں گیٹس بند کر دئیے

پولیس نے متعدد مظاہرین کو گرفتار کرلیا، بارش کے باوجود اسلام آباد میں احتجاج جاری، مظاہرین کے کنٹریکٹ ملازمین کی مستقلی ، اپ گریڈیشن، پنشن اصلاحات کے مطالبات

فیصل علوی جمعرات 20 فروری 2025 14:05

وفاقی سرکاری ملازمین کا مطالبات کے حق میں احتجاج، سیکرٹریٹ کے دونوں ..

اسلام آباد(اردوپوائنٹ اخبار تازہ ترین۔20فروری 2025)وفاقی دارالحکومت اسلام آباد میں وفاقی سرکاری ملازمین کا مطالبات کے حق میں احتجاج ،ملازمین نے سیکرٹریٹ کے دونوں گیٹس بند کر دئیے، پولیس نے ایکشن کرتے ہوئے متعدد مظاہرین کو گرفتار کرلیا،وفاقی سرکاری ملازمین کی جانب سے بارش کے باوجود اسلام آباد میں احتجاج جاری، ملازمین کے مطالبات بھی سامنے آگئے ،بتایا گیا ہے کہ مظاہرین کنٹریکٹ ملازمین کی مستقلی، اپ گریڈیشن، پنشن اصلاحات، تنخواہوں میں فرق کے خاتمے اور معذوری الاونس 10 فیصد کرنے کا مطالبہ کر رہے ہیں۔

اساتذہ کیلئے 25 فیصد ری بیٹ بحال کرنے کا بھی مطالبہ کیا جا رہا ہے۔مظاہرین نے یہ بھی مطالبہ کیا ہے کہ وفاقی سرکاری اداروں کے ملازمین کی تنخواہوں میں تفریق ختم کی جائے اور صوبائی طرز پر تمام وفاقی ملازمین کی اَپ گریڈیشن مع مراعات کی جائے۔

(جاری ہے)

لیو انکیشمنٹ اور وفاقی ملازمین کی پینشن اصلاحات واپس لی جائیں۔احتجاجی مظاہرے کے دوران مظاہرین کا مطالبہ ہے سکولوں و اداروں کی بندش و نجکاری کے بجائے بہتر اصلاحات کی جائیں۔

دورانِ ملازمت وفات پانے والوں کے بچوں کو بمطابق عدالتی فیصلہ ملازمت دی جائے۔ ظالمانہ پینشن اصلاحات کو فی الفور واپس لیا جائے۔واضح رہے کہ گزشتہ روزحکومتی کمیٹی سے مذاکرات کی ناکامی پر ملازمین کی جانب سے دھرنے کا اعلان کیا گیا تھا اور پارلیمنٹ ہاوس کے سامنے گرینڈ دھرنا دینے کااعلان کیاگیاتھا۔تنخواہوں و مراعات میں اضافے اور دیگر مطالبات کے حوالے سے حکومت اور سرکاری ملازمین میں جاری بات چیت نتیجہ خیز ثابت نہیں ہوئے تھے۔

آل گورنمنٹ ایمپلائز گرینڈ الائنس کے اعلامیہ میں بتایا گیا تھا کہ مذاکرات ناکام رہے تھے۔ پارلیمنٹ ہاوس کے سامنے دھرنا دیں گے۔دھرنے میں چاروں صوبوں، گلگت بلتستان، آزاد کشمیر سے سرکاری ملازمین شرکت کریں گے۔ وفاقی وزارتوں، ڈویڑنز، اداروں کے ملازمین بھی گرینڈ دھرنے میں شرکت کریں گے۔ملازمین کا کہنا تھا کہ حکومتی کمیٹی اور ملازمین قیادت کے درمیان مذاکرات کا آخری دور بھی ناکام ہو گیا تھا۔اعلان کے مطابق گرینڈ دھرنا مطالبات کی منظوری تک جاری رہے گا۔