Live Updates

عمران خان کی امریکی صدر ٹرمپ سے مداخلت کرنے کی اپیل درست اقدام ہے

بانی پی ٹی آئی کے پاس عالمی اداروں اور فورمزکے علاوہ کوئی اور راستہ بھی نہیں ہے، اس وقت ملک میں عدلیہ، پارلیمنٹ اور الیکشن کمیشن کو مفلوج کردیا گیاہے تو پھر اپیل کس سے کی جائے گی،سابق وزیر فواد چودھری

ثنااللہ ناگرہ ہفتہ 1 مارچ 2025 21:34

عمران خان کی امریکی صدر ٹرمپ سے مداخلت کرنے کی اپیل درست اقدام ہے

لاہور ( اردوپوائنٹ اخبار تازہ ترین۔ آئی پی اے ۔ یکم مارچ 2025ء ) سابق وزیر فواد چودھری نے کہا ہے کہ عمران خان کی ٹرمپ سے مداخلت کرنے کی اپیل درست اقدام ہے، بانی پی ٹی آئی کے پاس عالمی اداروں اور فورمزکے علاوہ کوئی اور راستہ بھی نہیں ہے ، اس وقت ملک میں عدلیہ، پارلیمنٹ اور الیکشن کمیشن کو مفلوج کردیا گیاہے تو پھر اپیل کس سے کی جائے گی۔ انہوں نے سماء نیوز کے پروگرام میں گفتگو کرتے ہوئے کہا کہ پاکستان اور یوکرین کے حالات بڑے مختلف ہیں، الیکشن مہم میں بھی یوکرین پر ٹرمپ نے کہا تھا کہ وہ جنگ جاری نہیں رکھیں گے، الیکشن میں ٹرمپ نے جو بھی وعدے کئے ان پر عملدرآمد کررہے ہیں، وعدوں کو پورا کرنے کی کوشش کررہے ہیں، دنیا تبدیل ہورہی ہے ، امریکا نے 1945میں جو اٹلانٹک معاہدہ ہوا تھا کہ یورپ کی سکیورٹی کی ذمہ داری امریکا کی ہوگی، تب سے امریکا سکیورٹی دے رہا ہے۔

(جاری ہے)

لیکن اب ٹرمپ 1945 کا معاہدہ تبدیل کرنے جارہے ہیں، وہ کہہ رہے ہیں ہ امریکا کی حد تک ذمہ دار ہیں، امریکا اگر یورپ کی سکیورٹی کا خیال نہیں کرے گاتو وہ اپنے راستے چین کیلئے کھول دیں گے، اس وقت صدر ٹرمپ امریکا کی سکیورٹی پر فوکس کررہے ہیں اور دنیا کی چودھراہٹ سے دستبردار ہوتے نظر آرہے ہیں۔ دیکھنا ہوگا کہ یورپ اس پر کس طرح ردعمل دیتا ہے۔

اس وقت ہمارے سامنے ایک نیا ورلڈ آرڈر سامنے آرہا ہے۔یوکرینی صدر جب اپنے ملک پہنچیں گے تو اس کے نتائج بھی سامنے آجائیں گے۔پاکستانی لیڈر جو بھی امریکی صدر ملاقات کرے گا، وہ نوازشریف ہوں، عمران خان یا شہبازشریف ہوں ظاہر ان کو سوچ سمجھ کر ہی بات کرنا ہوگی۔ اس وقت پاکستان کے سیاسی رہنماؤں کو عالمی صورتحال کا جائزہ لے کر آگے بڑھنے کی ضرورت ہے، پاکستان میں جب بھی روائتی سیاسی معاملات ہوتے ہیں تو پھر امریکا، سعودی عرب اور یواے ای مداخلت کرتا ہے، اس وقت ملک میں عدلیہ، پارلیمنٹ اور الیکشن کمیشن کو مفلوج کردیا گیاہے، پھر اپیل کس سے کی جائے؟عمران خان کی ٹرمپ سے مداخلت کرنے کی اپیل درست اقدام ہے ، اس کے علاوہ کوئی اور راستہ نہیں ہے ، اس وقت ملک میں عدلیہ، پارلیمنٹ اور الیکشن کمیشن کو مفلوج کردیا گیاہے، پھر اپیل عالمی اداروں اور فورمز سے ہی کی جائے گی۔