نوکری پیشہ خواتین اور طالبات کیلئے ایک ہزار الیکٹرک اسکوٹیز جلد فراہم کرنے کا منصوبہ زیر غور ہے، شرجیل انعام میمن

بدھ 5 مارچ 2025 22:01

کراچی (اُردو پوائنٹ اخبارتازہ ترین - اے پی پی۔ 05 مارچ2025ء) سندھ کے سینئر وزیربرائے اطلاعات، ٹرانسپورٹ و ماس ٹرانزٹ شرجیل انعام میمن نے کہا ہے کہ حکومت سندھ صوبے کی خواتین کو مزید بااختیار بنانے کیلئے بھرپور اقدامات کر رہی ہے اور نوکری پیشہ خواتین اور طالبات کیلئے ایک ہزار الیکٹرک اسکوٹیز جلد فراہم کرنے کا منصوبہ زیر غور ہے۔ جاری اعلامیہ کے مطابق ان خیالات کا اظہار انہوں نے الیکٹرک اسکوٹی بنانے والے چینی تاجروں کے وفد سے ملاقات کے دوران کیا۔

ملاقات میں سندھ میں الیکٹرک اسکوٹی متعارف کروانے اور ٹرانسپورٹ کو جدید خطوط پر استوار کرنے کے امکانات پر تبادلہ خیال بھی کیا گیا۔وفد نے سندھ کے ٹرانسپورٹ سیکٹر میں سرمایہ کاری میں گہری دلچسپی کا اظہار کرتے ہوئے جدید اور ماحول دوست سفری سہولیات کے فروغ کیلئے اپنی تجاویز پیش کیں۔

(جاری ہے)

اس موقع پروفد نے سینئر وزیر شرجیل انعام میمن کو اپنی کمپنی کی جدید ٹیکنالوجی اور ٹرانسپورٹ سسٹمز کے بارے میں تفصیلی بریفنگ بھی دی۔

سینئر وزیر شرجیل انعام میمن نے چینی سرمایہ کاروں کی دلچسپی کا خیرمقدم کرتے ہوئے سندھ میں الیکٹرک وہیکلز کا ایک مینوفیکچرنگ پلانٹ قائم کرنے کی پیشکش کی۔ انہوں نے وفد کو حکومت سندھ کی جانب سے مکمل تعائون اور سرمایہ کاری کیلئے سازگار پالیسیاں فراہم کرنے کی یقین دہانی کرائی۔ انہوں نے مزید کہا کہ صوبے میں الیکٹرک گاڑیوں کی تیاری سے صنعتی ترقی کو فروغ ملے گا اور روزگار کے نئے مواقع پیدا ہوں گے۔ملاقات میں سیکریٹری ٹرانسپورٹ و ماس ٹرانزٹ اسد ضامن، سندھ ماس ٹرانزٹ اتھارٹی کے ایم ڈی کمال دایو بھی موجود تھے۔