قائم علی شاہ کا زندہ بیٹا سرکاری ریکارڈ میں مردہ قرار

سندھ ہائی کورٹ سکھربینچ کااس سنگین غلطی کی تحقیقات کی ہدایت، متعلقہ افسران کے خلاف کارروائی کا بھی عندیہ دیا

ہفتہ 8 مارچ 2025 21:30

قائم علی شاہ کا زندہ بیٹا سرکاری ریکارڈ میں مردہ قرار

خیرپور(اُردو پوائنٹ اخبارتازہ ترین - این این آئی۔ 08 مارچ2025ء)سابق وزیر اعلی سندھ سید قائم علی شاہ کے زندہ بیٹے کو سرکاری ریکارڈ میں مردہ قرار دے دیا گیا۔خیرپور میں ایک حیرت انگیز واقعہ سامنے آیا ہے جس میں سابق وزیر اعلی سندھ سید قائم علی شاہ کے زندہ بیٹے ڈاکٹر سید لیاقت علی شاہ کو سرکاری ریکارڈ میں مردہ قرار دے دیا گیا۔ڈاکٹر سید لیاقت علی شاہ خیرپور کے سرکاری آنکھوں کے اسپتال (SIOVS) کے کنٹریکٹ پر انچارج ہیں اور سابقہ دور میں محکمہ صحت میں 161 سے زائد ملازمین کی بھرتی کی تھی۔

(جاری ہے)

محکمہ صحت کے اعلی افسران نے ان کے حوالے سے ایک انفرادی کیس کے سلسلے میں رپورٹ ایڈشنل رجسٹرار کے ذریعے عدالت میں پیش کی جس میں ڈاکٹر سید لیاقت علی شاہ کو مردہ قرار دیا گیا۔یہ انکشاف سندھ ہائی کورٹ سکھر بینچ کے سامنے آیا جس نے اس معاملے کی انکوائری رپورٹ طلب کی ہے جب کہ سیکرٹری صحت، ڈائریکٹر جنرل صحت اور ایڈیشنل سیکریٹری صحت کی جانب سے اس رپورٹ کی تصدیق کی گئی۔عدالت نے اس سنگین غلطی کی تحقیقات کی ہدایت کرتے ہوئے متعلقہ افسران کے خلاف کارروائی کا بھی عندیہ دیا ہے۔