سی ایم فری وائی فائی کا دائرہ کار مزید وسیع کر دیا گیا

فری وائی فائی سروس کا دائرہ کار جلد پنجاب بھر تک پھیلایا جائیگا،ترجمان سیف سٹیز

بدھ 19 مارچ 2025 23:18

لاہور (اُردو پوائنٹ اخبارتازہ ترین - آن لائن۔ 19 مارچ2025ء) پنجاب سیف سٹیز اتھارٹی نے لاہور میں مفت وائی فائی سروس کے دائرہ کار کو مزید بڑھا دیا ہے۔ اب لاہور میں 200 سے بڑھا کر 230 مقامات پر فری وائی فائی سروس فراہم کی جا رہی ہے۔ اس کے ساتھ ساتھ، لاہور میں فری وائی فائی سروس کو جدید ٹیکنالوجی وائی فائی 6 پر منتقل کر دیا گیا ہے۔ ترجمان سیف سٹیز اتھارٹی کے مطابق وائی فائی 6 ٹیکنالوجی کی بدولت صارفین کو مزید تیز انٹرنیٹ کی فراہمی ممکن ہو سکے گی۔

پنجاب سیف سٹیز اتھارٹی کی جانب سے صوبے کے 11 اضلاع میں 300 مقامات پر مفت وائی فائی سروس فراہم کی جا رہی ہے جن میں لاہور، قصور، ننکانہ صاحب، شیخوپورہ، سیالکوٹ، گجرات، جہلم، اٹک، ساہیوال، اوکاڑہ اور مری کے اہم مقامات شامل ہیں۔

(جاری ہے)

تفصیلات کے مطابق فری وائی فائی سروس کا دائرہ کار جلد ہی پنجاب بھر تک پھیلایا جائے گا۔ اب تک 17.70 ملین سے زائد صارفین نے 438 ٹی بی ڈیٹا استعمال کیا ہے جو کہ عوام کی جانب سے اس سہولت سے بھرپور استفادے کا ثبوت ہے۔

ترجمان نے شہریوں کو ہدایت کی کہ وہ اس مفت وائی فائی سروس سے اپنی روزمرہ کی زندگی کو آسان بنانے کے لئے فائدہ اٹھائیں۔ تاہم، یہ سروس ایمرجنسی سروسز کے لئے ہے اور ویڈیو سٹریمنگ یا انٹرٹینمنٹ کے مقاصد کے لئے استعمال نہیں کی جا سکتی۔ ترجمان سیف سٹیز نے مزید کہا کہ وزیر اعلیٰ پنجاب کے احکامات کے تحت پنجاب کو ڈیجیٹل صوبہ بنانے کی کوششیں جاری ہیں اور اس سلسلے میں جدید ترین ٹیکنالوجی کا استعمال یقینی بنایا جا رہا ہے۔