تاجر برادری دہشت گردی کی سرکوبی کیلئے مسلح افواج کے شانہ بشانہ کھڑی ہے ،سیف الرحمان

اتوار 23 مارچ 2025 14:20

لاہور (اُردو پوائنٹ اخبارتازہ ترین - اے پی پی۔ 23 مارچ2025ء) کوآرڈینیٹر وفاقی ٹیکس محتسب سیف ارحمان نے کہا ہے کہ پوری تاجر برادری دہشت گردی کی سرکوبی کیلئے مسلح افواج، فرنٹیئر کانسٹیبلری، پاکستان رینجرز اور قانون نافذ کرنے والے اداروں کے ساتھ کھڑی ہے۔

(جاری ہے)

اتوار کے روز یہاں جاری اپنے ایک بیان میں انہوں نے کہا کہ تاجر برادری دہشت گردی کے خاتمے اور سرمایہ کاری و تجارت کے لیے محفوظ ماحول کو یقینی بنانے کے لیے سکیورٹی فورسز کے تمام اقدامات کی مکمل حمایت کرتی ہے، قومی سلامتی کو لاحق کسی بھی خطرے کا مقابلہ کرنے کے لیے ہمیں مسلح افواج اور قانون نافذ کرنے والے اداروں کی صلاحیت پر مکمل اعتماد ہے۔

سیف ارحمان نے کہا کہ تاجر برادری کا موقف ہمیشہ یہی رہا ہے کہ تجارتی ترقی اور سرمایہ کاری کیلئے سازگار ماحول کی فراہمی انتہائی ضروری ہے تاکہ پاکستان ترقی کی راہ پر گامزن ہو۔ انہوں نے کہا کہ دہشت گردی نہ صرف معصوم شہریوں کی زندگیوں کو خطرے میں ڈالتی ہے بلکہ ملک کی معاشی و اقتصادی حیثیت کو بھی نقصان پہنچاتی ہے۔ انہوں نے علاقائی اسٹیک ہولڈرز پر بھی زور دیا کہ وہ عسکریت پسندی کے خلاف سخت رویہ اختیار کریں تاکہ خطے میں پائیدار امن، سلامتی اور ترقی کو یقینی اور سرمایہ کاری کو فروغ دیا جا سکے۔