کھیل داس کوہستانی کا یوم پاکستان پر قومی سلامتی کے لیے اتحاد پر زور

اتوار 23 مارچ 2025 15:20

اسلام آباد (اُردو پوائنٹ اخبارتازہ ترین - اے پی پی۔ 23 مارچ2025ء) وفاقی وزیر مملکت برائے مذہبی امور و بین المذاہب ہم آہنگی کھیل داس کوہستانی نے قوم کو یوم پاکستان کی تہہ دل سے مبارکباد پیش کرتے ہوئے قومی سلامتی اور خودمختاری کو یقینی بنانے کے لئے تمام سیاسی سٹیک ہولڈرز کے اتحاد کی اہمیت پر زور دیا۔یوم پاکستان کے موقع پر اتوار 23 مارچ کو ایک نجی نیوز چینل سے گفتگو کرتے ہوئے وزیر مملکت نے پاکستان کے شہداء پر فخر کا اظہار کیا اور اس دن کو پاکستان کی تاریخ کا یادگار دن قرار دیتے ہوئے کہا کہ ہمارے بزرگوں نے ایک بہت بڑے دشمن کو کامیابی سے شکست دی۔

انہوں نے اس بات پر زور دیا کہ یوم پاکستان یکجہتی، ہم آہنگی اور قومی اتحاد کے اصولوں پر قائم ایک مضبوط اور خوشحال پاکستان کی تعمیر کے ہمارے عہد کی تجدید کا دن بھی ہے۔

(جاری ہے)

انہوں نے قائداعظم محمد علی جناح کے وژن کی تقلید اور قوم کے درمیان اتحاد کو فروغ دینے کے لیے کام کرنے کی ضرورت پر زور دیا۔کھیل داس کوہستانی نے پی ٹی آئی پر زور دیا کہ وہ اپنے اختلافات کو ایک طرف رکھ کر ملکی خودمختاری اور قومی سلامتی کو لاحق خطرات کے خلاف متحد ہو جائیں۔

انہوں نے مزید کہا کہ دہشت گردی کے بڑھتے ہوئے خطرے سے نمٹنے کے لیے قومی اتحاد اور تعاون کی ضرورت ہے۔ انہوں نے خدشات کا اظہار کرتے ہوئے کہا کہ پی ٹی آئی کی سوشل میڈیا مہمات نقصان کا باعث بن رہی ہیں۔ انہوں نے اس بات پر زور دیا کہ جمہوریت بات چیت سے پروان چڑھتی ہے، اختلافات کو حل کرنے اور ملکی مفادات کو آگے بڑھانے میں تعمیری بات چیت اور گفت و شنید کی ضرورت ہے۔