ملائیشیا میں پاکستانی ہائی کمیشن میں یوم پاکستان ملی جوش و جذبے سے منایا گیا،پاکستانی ہائی کمشنر سید احسن رضا شاہ کاپاکستان کی آزادی کی جدوجہد میں آباؤ اجداد کی قربانیوں کو خراج تحسین

کوالالمپور (اُردو پوائنٹ اخبارتازہ ترین - اے پی پی۔ 23 مارچ2025ء) ملائیشیا میں پاکستانی ہائی کمیشن میں اتوار کو یوم پاکستان انتہائی قومی جوش و جذبے کے ساتھ منایا گیا۔پریس انفارمیشن ڈیپارٹمنٹ (پی آئی ڈی) کی طرف سے یہاں جاری کردہ پریس ریلیز میں کہا گیا ہے کہ پاکستانی کمیونٹی کے اراکین کی ایک بڑی تعداد نے مختلف شعبہ ہائے زندگی کی نمائندگی کرتے ہوئےکوالالمپور میں ہائی کمیشن میں پرچم کشائی کی تقریب میں شرکت کی۔

تقریب میں پاکستان کے ملائیشیا کے دوستوں نے بھی شرکت کی۔پاکستانی ہائی کمشنر سید احسن رضا شاہ نے قومی پرچم بلند کیااور حاضرین نے یک زبان ہو کر قومی ترانہ گایا۔اپنے خطاب میں ہائی کمشنر سید احسن رضا شاہ نے پاکستان کی آزادی کی جدوجہد میں آباؤ اجداد کی قربانیوں کو خراج تحسین پیش کیا۔

(جاری ہے)

انہوں نے بانی پاکستان قائداعظم محمد علی جناح کی وراثت کو خراج تحسین پیش کیا اور اس بات پر زور دیا کہ اس دن نے قوم کے جذبے کو زندہ رکھنے کا کام کیا۔

انہوں نے پاکستانیوں کی حوصلہ افزائی کی کہ وہ اپنے وطن کی ترقی اور خوشحالی کے لیے کام کریں، قومی دن تمام پاکستانیوں کو ملک کی مشترکہ کامیابی کے لیے خود کو مزید وقف کرنے کی ترغیب دیتا ہے کیونکہ قومی پرچم لوگوں کی اجتماعی امیدوں اور امنگوں کی علامت ہے۔ہائی کمشنر نے پاکستان اور ملائیشیا کے درمیان مضبوط، تاریخی دوطرفہ تعلقات پر بھی روشنی ڈالی اوریقین دلایا کہ یہ تعلقات آنے والے سالوں میں مزید گہرے ہوتے رہیں گے۔

سید احسن رضا شاہ نے ملائیشیا کی شاندار ترقی اور خوشحالی میں پاکستانی کمیونٹی کے تعاون پر فخر کا اظہار کرتے ہوئے انہیں دونوں ممالک کے درمیان پل کا کردار ادا کرنے کے طور پر تسلیم کیا۔انہوں نے کمیونٹی کی اپنے وطن سے غیر متزلزل محبت اور پاکستان کی ترقی کے لیے ان کے عزم کو سراہا۔ہائی کمشنر نے کہا کہ اس دن ہمیں بھارت کے غیر قانونی طور پر زیرتسلط مقبوضہ جموں و کشمیر کے لوگوں کی قربانیوں کو بھی یاد رکھنا چاہیے جو مسلح بھارتی افواج کی جانب سے مظالم اور سنگین انسانی حقوق کی خلاف ورزیوں کا سامنا کر رہے ہیں۔

انہوں نے اس بات کا اعادہ کیا کہ پاکستان کشمیریوں کے حق خودارادیت کی جدوجہد میں ان کے ساتھ کھڑا ہے۔ہائی کمشنر نے ملائیشیا میں تقریباً 200,000 پاکستانیوں کی میزبانی کرنے پر ملائیشیا کی قیادت اور حکومت کا تہہ دل سے شکریہ ادا کیا جو مختلف شعبوں میں ملازمت کر رہے ہیں۔انہوں نے ملائیشیا کی معاشی اور سماجی ترقی میں ان کی گرانقدر شراکت کو تسلیم کرتے ہوئے پاکستانی کمیونٹی کی مسلسل حمایت اور مہمان نوازی کا اعتراف کیا۔تقریب کا اختتام پاکستان کی ترقی، خوشحالی اور اتحاد کے لیے دعا کے ساتھ ہوا۔