گورنرسندھ کی حیدرآباد آمد۔ لطیف آباد کے مکینو ں کے ہمراہ 24ویں سحری کی

منگل 25 مارچ 2025 17:55

کراچی (اُردو پوائنٹ اخبارتازہ ترین - این این آئی۔ 25 مارچ2025ء)گورنرسندھ کامران خان ٹیسوری نے 24ویں سحری حیدرآباد کے علاقہ لطیف آباد کے مکینوں کے ساتھ کی۔ گورنرسندھ جب لطیف آباد پہنچے تو علاقہ مکینوں نے ان کا والہانہ استقبال کیا۔ان پر پھول کی پتیاں نچھاور کیں اور آتش بازی کا شاندار مظاہرہ بھی کیا گیا۔ گورنرسندھ کچھ دیر علاقہ مکینوں کے درمیان گھل مل گئے۔

ان کے مسائل معلوم کئے۔ لوگوں نے گورنرسندھ کے ہمراہ سیلفیاں بھی بنوائیں۔اس موقع پر گورنرسندھ نے کہا کہ کراچی کے بعد آج صوبہ کے دوسرے بڑے شہر حیدرآباد آیا ہوں۔ کراچی کے بعد یہاں بھی لوگوں کی محبت قابل دید ہے۔ انہوں نے مزید کہا کہ حیدرآباد کے لوگوں نے آج میرا تاریخ ساز استقبال کیا جس پر ان کا شکریہ ادا کرتاہوں۔

(جاری ہے)

حیدرآباد میں میڈیا سے گفتگو کرتے ہوئے گورنرسندھ نے کہا کہ حیدرآباد کے صحافی برادری کا مثبت اور بھرپور کوریج پر شکریہ ادا کرتاہوں۔

انہوں نے کہا کہ حیدرآباد پاکستان کی معیشت میں اہم کردار ادا کرنے والا سندھ کا دوسرا بڑا شہر ہے۔ شہر کے دیرینہ مسائل کے حل کے لئے سنجیدہ اور عملی اقدامات کی ضرورت ہے۔انہوں نے مزید کہا کہ ٹیکس کی ادائیگی کے باوجود بنیادی سہولیات کا فقدان تشویشناک ہے۔ گورنرسندھ نے حیدرآباد کے طلبہ کے لئے بیرون ملک تعلیم کے لئے اسکالر شپ دینے کا اعلان بھی کیا۔

گورنرسندھ نے کہا کہ ترقیاتی منصوبوں کے لئے ٹھوس اقدامات کئے بغیر شہری مسائل حل نہیں ہوں گے۔ حیدرآباد کے عوام نے ہمیشہ ثابت قدمی دکھائی، انہیں وسائل کی منصفانہ تقسیم ملنی چاہئے۔ شہریوں کی فلاح و بہبود کے لئے بلا تفریق اقدامات کیے جائیں۔ انہوں نے کہا کہ آج میں اجازت دے رہا ہوں کہ میری بہن کو کوئی تنگ کرے تو وہ کہے میرا بھائی گورنرسندھ ہے۔میرے بھائی یا بزرگوں کو اگر کوئی تنگ کرے تو بھی کہے کہ میرا بھائی گورنرہے۔