کراچی،ڈیفنس میں ضعیف مالکان کو بے ہوشی کی دوا پلا کر چوری کرنے والا سیکیورٹی گارڈ اور گھریلو ملازمہ گرفتار

کراچی(اُردو پوائنٹ اخبارتازہ ترین - این این آئی۔ 27 مارچ2025ء)پولیس نے ڈیفنس کے بنگلے میں ضعیف مالکان کو بے ہوشی کی دوا پلا کر چوری کرنے والا سیکیورٹی گارڈ اور گھریلو ملازمہ کوگرفتارکرلیا گیاہے تاہم سیکیورٹی گارڈ نے دوستی کے چکر میں واردات کا انکشاف کیاہے۔تفصیلات کے مطابق کراچی ڈیفنس پولیس شعبہ تفتیش نے ٹیکنیکل بنیادوں پر کارروائی کرتے ہوئے ڈیفنس فیز ون کے بنگلے میں ضعیف مالکان کو بے ہوش کرکے چوری کرنے والی گھریلو ملازمہ اور سیکیورٹی گارڈ کو گرفتار کرکے سامان برآمد کرلیا۔

ایس پی انویسٹی گیشن ساتھ علی حسن نے بتایا کہ سوشل میڈیاپروائرل چوری کیس کے مرکزی ملزمان کو گرفتار کرلیا ہے اور ملزمان کے قبضے سے 100 فیصد ریکوری کرلی گئی۔ایس پی انویسٹی گیشن سائوتھ نے کہاکہ ڈی ایچ اے فیز 1 میں 21 مارچ کوگھرمیں چوری ہوئی تھی، گھریلو ملازمہ گھر کا سارا قیمتی سامان لوٹ کر فرار ہوگئی تھی۔

(جاری ہے)

واردات کامقدمہ ڈیفنس تھانے میں فیصل ضیا کی مدعیت میں درج ہوا، ایس آئی اوڈیفنس اعظم گوپانک کو کیس حل کرنے کا کہا۔

ایس پی انویسٹی گیشن سائوتھ نے کہا کہ کینیڈا میں مقیم خاتون نے بزرگ والدین کی خدمت کیلئے میڈ کرن رکھی تھی، کرن امیر نے ہوشیاری سے اپنے ساتھی اسد کو بھی ملازمت پررکھوایا، اسد سیکیورٹی کمپنی میں ملازمت کرتاتھا۔انھوں نے بتایا کہ 21 مارچ کو دونوں نے سحری کے وقت گھر میں واردات کی، گھر کے مالک عبدالعزیز اور ان کی اہلیہ کو کھانے میں کچھ ملا کردیا، سحری کھاتے ہی دونوں کی حالت بگڑی اور وہ بے ہوش ہوگئے اور جب اٹھ کر دیکھا تو گھر کا قیمتی سامان اور دونوں ملازمین غائب تھے۔

علی حسن نے کہاکہ ملزمان واٹر ڈسپنسر کپڑے موبائل فون اور الماری تک لے گئے تھے جبکہ پانی کے کین کراکری سیٹ اور پانی کے کین تک چوری کیے۔ایس پی انویسٹی گیشن نے مزید کہا کہ ٹیکنیکل ٹیم اور ایس آئی او ڈیفنس نے انتھک محنت سے ملزمان کوگرفتار کیا دوسری جانب گرفتار سیکیورٹی گارڈ نے دوستی کے چکر میں چوری کرنے کی واردات کا انکشاف کیا۔ملزم نے بیان میں کہا کہ میں3سال سے سیکیورٹی گارڈکی نوکری کررہاتھا، کرن امیر نے مجھے فون کرکے منصوبہ بندی کے تحت بنگلے میں کام دلوایا۔

گرفتار سیکیورٹی گارڈ نے کہا کہ کرن کے مطابق اس کے کچھ بقایا جات نکلتے تھے، جو ادا نہیں کیے جارہے تھے۔ملزم نے بتایا کہ کرن نے مجھے ضعیف میاں بیوی کو بیہوش کرنے کیلئے نیندکی گولیاں لانے کاکہا،میڈیکل اسٹور پر گیا جنہوں نے بغیر ڈسکرپشن کے مجھے گولیاں دے دیں ، گولیاں لاکر گھریلوملازمہ کو دی اس نے کھانے میں ملادی۔سیکیورٹی گارڈ نے کہا کہ دونوں کے بیہوش ہونے کے بعد میں گاڑی لینے چلاگیااورملازمہ سامان نکالنے لگی اور سامان کو قائد اعظم کالونی کے قریب گھر منتقل کیا۔