عامر خان ’’لاپتہ لیڈیز‘‘سے ریجیکٹ ہوگئے تھے

ْ عامر خان نے’’لاپتہ لیڈیز‘‘میں روی کشن کے کردار کے لیے آڈیشن دیا تھا، مگرسلیکٹ نہ ہو سکے

جمعہ 28 مارچ 2025 11:00

ممبئی (اُردو پوائنٹ اخبارتازہ ترین - این این آئی۔ 28 مارچ2025ء)عامر خان کی سابقہ اہلیہ کرن را کی باکس آفس پر دھوم مچانے والی فلم ’’لاپتہ لیڈیز‘‘کے آڈیشن میں عامر خان کو ناکامی کا مزہ چکھنا پڑا تھا۔’’لاپتہ لیڈیز‘‘نے 2025 کے آئیفا ایوارڈز میں 10 انعامات جیتے، جن میں روی کشن کے لیے بہترین معاون اداکار کا ایوارڈ بھی شامل تھا۔ اب یہ انکشاف سامنے آیا ہے کہ روی کشن ابتدا میں اس فلم کا حصہ بننے والے نہیں تھے بلکہ کرن کے سابق شوہر اور فلم کے پروڈیوسر عامر خان نے بھی اس کردار کے لیے آڈیشن دیا تھا۔

عامر خان نے اپنا آڈیشن ٹیپ یوٹیوب پر شیئر کیا، جس پر اب روی کشن کا ردعمل سامنے آیا ہے۔ عامر خان نے’’لاپتہ لیڈیز‘‘میں روی کشن کے کردار کے لیے آڈیشن دیا تھا، مگر انہوں نے خود ہی فیصلہ کیا کہ روی کشن زیادہ بہتر انتخاب ہیں۔

(جاری ہے)

اس پوسٹ کو روی کشن نے اپنے آفیشل فیس بک پیج پر شیئر کیا، بعد ازاں، روی کشن نے ایک ویڈیو بھی شیئر کی، جس میں انہوں نے کیپشن میں لکھا کہ عامر خان نے 'لاپتہ لیڈیز' میں روی کشن کے کردار کے لیے آڈیشن دیا تھا، مگر وہ منتخب نہ ہو سکے۔

اس پوسٹ پر مداحوں نے بھرپور ردعمل دیا اور روی کشن کی کارکردگی کو سراہا۔ ایک صارف نے تبصرہ کیا کہ سب سے بہترین بات یہ ہے کہ خود عامر خان، جنہیں مسٹر پرفیکشنسٹ کہا جاتا ہے، نے بھی تسلیم کیا کہ روی کشن ان سے بہتر تھے۔خیال رہے کہ ’’لاپتہ لیڈیز‘‘میں اسپرش سریواستو، نیتانشی گوئل اور پرتھیبھا رنتا جیسے نئے اداکار شامل ہیں۔ فلم کی کہانی 90 کی دہائی کے دیہی ہندوستان میں دو دلہنوں کے ایک دوسرے سے بدل جانے کے گرد گھومتی ہے۔اس فلم کو زبردست پذیرائی ملی اور 2025 کے آئیفا ایوارڈز میں 10 ٹرافیاں حاصل کیں، جن میں روی کشن کے لیے بہترین معاون اداکار کا ایوارڈ بھی شامل تھا۔