آئی جی پنجاب ڈاکٹر عثمان انور کی زیر صدارت سنٹرل پولیس آفس میں سی سی ڈی امور بارے اہم اجلاس

اتوار 30 مارچ 2025 21:20

لاہور (اُردو پوائنٹ اخبارتازہ ترین - اے پی پی۔ 30 مارچ2025ء) انسپکٹر جنرل پنجاب ڈاکٹر عثمان انور کی زیر صدارت سنٹرل پولیس آفس پنجاب لاہور میں اہم اجلاس منعقد ہوا۔ ایڈیشنل آئی جی سی سی ڈی سہیل ظفر چٹھہ، ایس ایس پی انٹیلی جنس سی ٹی ڈی عمر فاروق سلامت، ایس پیز کیپٹن (ر) قاضی علی رضا، عبدالحنان، آفتاب پھلروان و دیگر افسران اجلاس میں موجود تھے جبکہ ایڈیشنل آئی جی ساتھ پنجاب، سی سی پی او لاہور، آر پی اوز، سی پی اوز، ڈی پی اوز اور سینئر پولیس افسران نے بذریعہ ویڈیو لنک شرکت کی۔

آئی جی پنجاب ڈاکٹر عثمان انور نے رمضان المبارک میں بہترین سکیورٹی انتظامات پر پولیس فورس کو شاباش دی اور ہدایت کی کہ چاند رات اور عید الفطر پر بھی مساجد، مارکیٹوں اور حساس و تفریحی مقامات کو بھرپور سکیورٹی فراہم کریں۔

(جاری ہے)

آئی جی پنجاب نے کہا کہ وزیر اعلی پنجاب مریم نواز کی ہدایت پر مارکیٹوں میں لیڈیز پولیس سکواڈ کے بہترین نتائج سامنے آئے ہیں۔

کرائم کنٹرول ڈیپارٹمنٹ جلد فعال، 5.6 ارب روپے فنڈز اور 04 ہزار سیٹوں کی منظوری دی جا چکی ہے۔ رائٹ مینجمنٹ پولیس کے لئے 2000 سیٹوں کی منظوری اور شہدا پیکج کی اپ گریڈیشن کی گئی ہے۔ ڈاکٹر عثمان انور نے کہا کہ سی سی ڈی، رائٹ مینجمنٹ پولیس اور پیرا کی تشکیل سے پنجاب پولیس میں 04 سے 05 ہزار مزید پروموشنز ہوں گی۔ قانون سازی مکمل ہے اور سی سی ڈی کے مختلف عہدوں پر جلد ٹرانسفر پوسٹنگز ہوں گی۔

سی سی ڈی انفراسٹرکچر، ہیومن ریسورس، ٹرانسپورٹ کے لئے آر پی اوز اور ڈی پی اوز اقدامات یقینی بنائیں۔ ڈی پی اوز سنگین جرائم کے اشتہاری مجرمان، شوٹرز، گینگز، اغوا کاروں، منشیات فروشوں اور موٹر سائیکلز و کار چوروں کے اہداف فوری طور پر سی سی ڈی کو دیں۔ متحرک کریمنلز کا سنٹرلائزڈ ڈیٹا مرتب کرکے فالو اپ میکانزم تشکیل دیں۔