صوبائی وزیر ترقیات و منصوبہ بندی میر ظہور بلیدی کی تمام اہل وطن کو عیدالفطرکی مبارکباد

پیر 31 مارچ 2025 18:40

کوئٹہ (اُردو پوائنٹ اخبارتازہ ترین - اے پی پی۔ 31 مارچ2025ء) صوبائی وزیر ترقیات و منصوبہ بندی میر ظہور بلیدی نے تمام اہل وطن کو عیدالفطرکی مبارکباد دیتے ہوئے کہا ہے کہ عیدالفطر رمضان المبارک کے بعد اپنے پرہیزگار اور نیک بندوں کے لئے اللہ تعالیٰ کی طرف سے ایک انعام ہے جو پورے ماہ تزکیہ نفس کرتے ہوئے اللہ تعالیٰ کی رضا اور خوشنودی کے لئے روزے رکھتے ہیں اور عبادات کا خصوصی اہتمام کرتے ہیں۔

عیدملنے آئے ہوئے وفد سے بات چیت کرتےہوئے صوبائی وزیر نے کہا کہ عیدالفطر کا دن تمام مسلمانوں کے لئے خوشیوں کا پیغام لے کر آتا ہے اور اس دن اللہ تعالیٰ اپنے متقی اور عبادت گزار بندوں سے خوش ہوکر ان کی تمام دعائیں قبول فرماتے ہیں۔ انہوں نے کہا کہ آج کا دن اس بات کا تقاضا کرتاہے کہ ہم اپنی خوشیوں میں ان افراد کو بھی شامل کریں جو یہ دن منانے کی استطاعت نہیں رکھتے۔

(جاری ہے)

انہوں نے کہا کہ پاکستان اور اسلام دشمن قوتیں ہمارے ملک کو کمزور کرنا چاہتی ہیں لہٰذا موجودہ صورتحال کا تقاضا ہے کہ اپنے گروہی اور لسانی اختلافات کو بھلا کراسلام اور پاکستان دشمن عناصر کے مقابلے میں اتحادواتفاق کے ساتھ ایک ہوجائیں اور انتہا پسندی، شرانگیزی اور دہشت گردی کے ناسور کو جڑ سے اکھاڑ پھینکیں۔ انہوں نے کہا کہ آئیں آج کے دن ہم اپنے ان سیکورٹی اہلکاروں اور شہریوں قربانیوں کو خراج عقیدت بھی پیش کریں جنہوں نے مادر وطن کی حفاظت کے لئے اپنی جانوں کے نذرانے پیش کئے انہوں نے زور دیا کہ ہم اپنی عبادات میں ملکی استحکام، ترقی، خوشحالی اور امن کے لئے خصوصی دعاؤں کا اہتمام کریں اور اس مبارک دن غرباء، مساکین اور لاچار لوگوں کو بھی اپنی خوشیوں میں شامل کریں، انہوں نے دعا کی کہ اللہ تعالیٰ ہمارے ملک کی حفاظت کرے اور پوری مسلم امہ کو اتحاد ویکجہتی عطاء فرمائے اور دشمنوں کے ناپاک عزائم کو ناکام بنائے۔