ڈپٹی کمشنر راوی ٹائون کا مختلف مقامات کا دورہ ، صفائی ستھرائی کے اقدامات کا جائزہ لیا

جمعرات 3 اپریل 2025 13:20

لاہور (اُردو پوائنٹ اخبارتازہ ترین - اے پی پی۔ 03 اپریل2025ء) ڈپٹی کمشنر لاہور سید موسی رضا نے تحصیل راوی ٹائون کے مختلف مقامات کا دورہ کیا اور صفائی ستھرائی کے اقدامات کا جائزہ لیا۔ڈی سی لاہور کو واسا حکام کی جانب سے لاہور ڈویلپمنٹ پلان کے تحت جاری اسکیموں پر بریفنگ دی گئی، جس کے مطابق 100 ترقیاتی اسکیموں میں سے 35 مکمل کر لی گئی ہیں، جبکہ بقیہ اسکیموں کو مئی تک مکمل کرنے کے لیے کام کی رفتار تیز کر دی گئی ہے۔

بریفنگ میں بتایا گیا کہ مرحلہ وار مکمل ہونے والی سکیمیں ایم سی ایل کے حوالے کی جائیں گی جبکہ ڈی سی لاہور نے ہدایت دی کہ منصوبوں میں شفافیت اور معیار کو ہر صورت برقرار رکھا جائے۔انہوں نے بصری آلودگی کے خاتمے کے لیے بھی واضح ہدایات جاری کرتے ہوئے کہا کہ تمام بینرز، پوسٹرز اور فلیکسز فوری طور پر ہٹائے جائیں۔

(جاری ہے)

انہوں نے سگیاں پل اور راوی پل کے اطراف میں موجود خانہ بدوشوں اور مویشیوں کے انخلا کی بھی ہدایت کی اور کہا کہ شہری آبادی اور راوی کنارے سے خانہ بدوشوں کو جلد منتقل کیا جائے۔

انہوں نے عید کے ایام میں صفائی کے بہترین انتظامات پر ایل ڈبلیو ایم سی کی کاوشوں کو سراہا اور صفائی مہم کو مزید مثر انداز میں جاری رکھنے کی ہدایت کی۔ ڈی سی لاہور نے انتظامی افسران کو سختی سے ہدایت دی کہ جہاں کہیں بھی گندگی کے پوائنٹس نظر آئیں، انہیں فوری طور پر کلیئر کروایا جائے۔ڈی سی لاہور نے کہا کہ وزیر اعلی پنجاب مریم نواز شریف کی ہدایت پر کلین مشن کی تکمیل کے لیے تمام ممکنہ اقدامات کیے جا رہے ہیں تاکہ لاہور کو ایک صاف ستھرا اور خوبصورت شہر بنایا جا سکے۔ سی ای او ایم سی ایل شاہد عباس کاٹھیا، اسسٹنٹ کمشنر راوی زون طارق شبیر، ایل ڈبلیو ایم سی، واسا اور دیگر متعلقہ اداروں کے افسران بھی ان کے ہمراہ موجود تھے۔