Live Updates

وفاقی بجٹ کی تیاری ، مشاورت کیلئے آئی ایم ایف کا وفد کل اسلام آباد پہنچے گا

آئی ایم ایف وفد آئندہ مالی سال کے بجٹ بشمول ٹیکس ریونیو اقدامات، اخراجات پر کنٹرول اور دیگر ترقیاتی اخراجات کے بجٹ کے حوالے سے پاکستانی حکام کے ساتھ مذاکرات کرے گا

فیصل علوی جمعرات 3 اپریل 2025 13:26

وفاقی بجٹ کی تیاری ، مشاورت کیلئے آئی ایم ایف کا وفد کل اسلام آباد پہنچے ..

اسلام آباد(اردوپوائنٹ اخبار تازہ ترین۔03اپریل 2025)وفاقی بجٹ 2025ء کی تیاری اور مشاورت کیلئے عالمی مالیاتی فنڈ(آئی ایم ایف )کا وفد کل4 اپریل کو اسلام آباد پہنچے گا،آئی ایم ایف وفد آئندہ مالی سال کے بجٹ بشمول ٹیکس ریونیو اقدامات، اخراجات پر کنٹرول اور دیگر ترقیاتی اخراجات کے بجٹ کے حوالے سے پاکستانی حکام کے ساتھ مذاکرات کرے گا،آئی ایم ایف وفد کے دورہ پاکستان کے دوران پاکستانی مالیاتی حکام اور آئی ایم ایف کے ماہرین مل کر بجٹ تجاویز تیار کریں گے جنہیں حتمی منظوری کیلئے پیش کیا جائے گا۔

بجٹ کو حتمی شکل دینے کےلئے آئی ایم ایف کی ٹیم پاکستانی حکام سے مل کر تجاویز تیار کرے گی۔ذرائع کے مطابق آئندہ مالی سال کا وفاقی بجٹ جون کے پہلے ہفتے میں پیش کیا جائے گا۔

(جاری ہے)

یہ بھی بتایاگیا ہے کہ آئی ایم ایف نے دورہ پاکستان کے دوران جائزہ مذاکرات میں پاکستان کے ٹیکس ریونیو ہدف کم کرنے پر بھی اتفاق کیاتھا اور 12970ارب روپے سے کم کر کے اس کو 12330ارب روپے کر دیاگیا تھاجو رواں سال حاصل کیا جائے گا اس طرح ایف بی آر ٹیکس ریونیو میں موجودہ شارٹ فال کو پورا کرنے کے قابل ہوسکے گا۔

یاد رہے کہ اس سے قبل آئی ایم ایف نے جائیداد لین دین کی ٹیکس شرح کم کرنے سے انکارکردیاتھا اور ایف بی آر کی درخواست مسترد کردی تھی ۔سٹاف لیول معاہدے کیلئے پاکستان کوعالمی مالیاتی فنڈکو مزید یقین دہانیاں کروانی ہوں گی ۔آئی ایم ایف نے جائیداد کی لین دین پر ٹیکس میں کمی کی درخواست پر اپنے تحفظات کا اظہار کیا تھا۔میڈیا رپورٹس کے مطابق ذرائع کاکہنا تھا کہ مارچ 2025ءکے اہداف کم کرنے پر بھی اتفاق نہیں ہوا تھاجبکہ ٹیکس میں کمی پر کوئی معاہدہ نہیں ہوا۔

آئی ایم ایف نے تمباکو اور مشروبات پر ٹیکس میں نرمی کی درخواست بھی مسترد کر دی گئی تھی جبکہ آئی ایم ایف نے ایف بی آر کی ودہولڈنگ ٹیکس میں 2 فیصد کمی کی درخواست بھی منظورنہیں کی تھی۔آئی ایم ایف کی جانب سے کلائمیٹ فنانس کو فنڈ سہولت میں شامل کرنے پر آمادگی ظاہر کر دی گئی تھی جوریزیلینس اینڈ سٹینیبلیٹی فیسلٹی کے تحت کلائمیٹ فنانس کی پیشکش کی جائے گی۔عالمی مالیاتی فنڈ نے صوبوں کو گندم کی خریداری میں مداخلت سے روکنے کی شرط عائد بھی کی تھی۔