وزیراعلیٰ پنجاب مریم نواز شریف سرکاری سکولوں میں معیار تعلیم کو بہتر سے بہترین بنانے کیلئے پُر عزم ہیں، منشاء اللہ بٹ

ہفتہ 5 اپریل 2025 19:52

سیالکوٹ (اُردو پوائنٹ اخبارتازہ ترین - اے پی پی۔ 05 اپریل2025ء) رکن صوبائی اسمبلی محمد منشاء اللہ بٹ نے کہا ہے کہ وزیر اعلیٰ پنجاب مریم نواز شریف سرکاری سکولوں میں معیار تعلیم کو بہتر سے بہترین بنانے کیلئے پُر عزم ہیں، سکولوں میں مفت تعلیم، کتب، لیب ٹاپس اور اعلیٰ تعلیم کیلئے اربوں روپے کے تعلیمی وظائف کا اجراء اور پڑھ لکھ کر اپنے کاروبار کیلئے نوجوانوں کو بلا سود قرضوں کی فراہمی تعلیم دوست حکومت کی اولین ترجیحات ہیں۔

یہ بات انہوں نے گورنمنٹ گرلز ماڈل ہائی سکول بٹر سیالکوٹ کی بورڈ آف انٹر میڈیٹ اینڈ سیکنڈری ایجوکیشن گوجرانوالہ کے میٹرک کے امتحانات میں نمایاں پوزیشن حاصل کرنے والی طالبات میں میڈلز اور تعریفی اسناد اوریونیفارم کی تقسیم کے سلسلہ میں منعقدہ تقریب سے خطاب کرتے ہوئے کہی۔

(جاری ہے)

انہوں نے کہا کہ گورنمنٹ ماڈل گرلز ہائی سکول بٹر کی طالبات کی بورڈ میں پوزیشنز اساتذہ کی انتھک محنت اور لگن کا نتیجہ ہے۔

انہوں نے کہا کہ سکول کی توسیع کیلئے مجوزہ سرکاری اراضی کو سکول کے نام منتقل کیا جائے گا اور اس درسگاہ کو علاقہ کا بہترین ادارہ بنانے میں کوئی کسر اٹھا نہیں رکھی جائے گی۔ انہوں نے اساتذہ پر زور دیا کہ وہ اس جوش و جذبے سے ملک کے مستقبل کو زیور تعلیم سے آراستہ کرتے رہیں۔ انہوں نے کہا کہ ایک مرد کو تعلیم دینا ایک فرد کو تعلیم دینا ہے جبکہ ایک عورت کو تعلیم دیناایک خاندان کو تعلیم دینے کے مترادف ہے۔

انہوں نے کہاکہ ہماری خواتین باصلاحیت اور بہادر ہیں جب بھی ان کو اپنے جوہر دکھانے کا موقع ملا ہے انہوں نے ملک و قوم کو مایوس نہیں کیا۔ سٹی صدر پی ایم ایل این ویمن ونگ نصرت جمشید، مسلم لیگ ن کے مقامی رہنما چوہدری نثار احمد، سی ای او ایجوکیشن مجاہد حسین علوی، سابق ڈائریکٹر لوکل گورنمنٹ عبدالحمید قاسم، پرنسپل فہمینہ بشیر، شہزاد خلیجی، حامد رضا، نبیل لون اور بلال احمد بٹ بھی اس موقع پر یہاں موجود تھے۔