یوکرین: روسی حملے میں بچوں سمیت 12 افراد ہلاک، یو این کی مذمت

یو این اتوار 6 اپریل 2025 02:15

اسلام آباد (اُردو پوائنٹ ۔ UN اردو۔ 06 اپریل 2025ء) امدادی امور کے لیے اقوام متحدہ کے رابطہ دفتر (اوچا) نے یوکرین کے شہر کریوی ری پر روس کے تازہ ترین میزائل حملے کی سخت مذمت کی ہے جس میں نو بچوں سمیت درجن سے زیادہ لوگ ہلاک اور متعدد زخمی ہوئے ہیں۔

ملک میں ادارے کے نمائندے میتھائس شمالے نے کہا ہے کہ نیپرو کے علاقے میں ہونے والے اس حملے کے بعد یوکرین بھر میں ایسے ہی حملے دیکھنے کو ملے جن میں متعدد شہریوں کے ہلاک و زخمی ہونے کی اطلاعات موصول ہوئیں جبکہ اس سے ایک روز پہلے ملک کے دوسرے بڑے شہر خارکیئو کو بھی حملوں کا نشانہ بنایا گیا۔

انہوں نے کہا ہے کہ ان حملوں سے لوگوں کو ناقابل برداشت تکالیف کا سامنا ہے۔

(جاری ہے)

بین الاقوامی قانون کے تحت شہریوں کو جنگی کارروائیوں سے تحفظ حاصل ہونا چاہیے۔

ہولناک حملہ

اقوام متحدہ کے ادارہ برائے اطفال (یونیسف) نے یوکرین میں شہری علاقوں پر حملے فوری بند کرنے کا مطالبہ کیا ہے۔ یورپ اور وسطی ایشیا کے لیے ادارے کی ریجنل ڈائریکٹر ریگینا ڈی ڈومینیکس نے کریوی پر حملے کو ہولناک قرار دیتے ہوئے بتایا ہے کہ اس میں تین ماہ کا ایک بچہ بھی ہلاک ہوا۔

اس کارروائی میں ساکاشینسکی نامی علاقے میں ایک رہائشی عمارت پر میزائل داغا گیا جہاں بہت سے لوگ جمع تھے۔ میزائل گرنے سے متعدد رہائشی مکانات، سکولوں اور ایک ریستوران کو شدید نقصان پہنچا۔ حملے کے بعد علاقے میں تباہی کے مناظر دیکھنے کو ملے جہاں والدین اپنے بچوں کو ہلاک و زخمی دیکھ کر رو رہے تھے۔

ان کا کہنا ہے کہ کسی بچے کو ایسی دہشت کا سامنا نہیں ہونا چاہیے اور کسی ماں باپ کو ایسی تکلیف نہیں پہنچنی چاہیے۔

اڑھائی ہزار بچے ہلاک یا زخمی

یونیسف اور اس کے امدادی شراکت دار حملوں سے متاثرہ لوگوں کو مدد دینے اور ہنگامی امداد پہنچانے کے لیے مقامی حکام کے اشتراک سے کام کر رہے ہیں۔

ریگینا ڈومینیکس نے کہا ہے کہ فروری 2022 میں یوکرین پر روس کا حملہ شروع ہونے کے بعد 2,500 سے زیادہ بچے ہلاک یا زخمی ہو چکے ہیں اور مزید لاکھوں بچوں کی زندگیاں شدید نقصان سے دوچار ہیں۔

ان کا کہنا ہے کہ اس جنگ میں شہری علاقوں پر دھماکہ خیز ہتھیاروں سے وحشیانہ حملے اور شہری تنصیبات کی تباہی کے نتیجے میں بچے غیرمتناسب طور سے متاثر ہو رہے ہیں۔