اسرائیلی فوج کی سکیورٹی میں درجنوں یہودی آباد کاروں کا قبلہ اول پردھاوا

قابض فوج کی موجودگی میں تلمودی تعلیمات کے مطابق مذہبی رسومات ادا کیں

اتوار 6 اپریل 2025 20:30

مقبوضہ بیت المقدس (اُردو پوائنٹ اخبارتازہ ترین - این این آئی۔ 06 اپریل2025ء)یہودی آباد کاروں کی بڑی تعداد نے اسرائیلی پولیس اور فوج کی فول پروف سکیورٹی میں مسجد اقصی پر دھاوا بول دیا۔ غیر ملکی میڈیا کے مطابق قابض فورسزکی فول پروف سکیورٹی میں درجنوں آباد کاروں نے اتوار کو علی الصبح مسجد اقصی کے صحنوں میں دھاوا بولا اور جگہ جگہ پھیل گئے۔

اس دوران قابض فوج کی موجودگی میں آباد کاروں نے تلمودی تعلیمات کے مطابق مذہبی رسومات ادا کیں۔قابض فوج کے گھیراو سے قبل فلسطینیوں کی بڑی تعداد قبلہ اول میں موجود تھی۔ انہوں نے اسرائیلی فوج کے خلاف شدید نعرے بازی کی۔ فلسطینی نمازیوں کیاللہ اکبر کے فلک شگاف نعروں سے قبلہ اول کی فضا گونج اٹھی۔ اس دوران فلسطینی نوجوانوں نے قابض فوج پر سنگ باری کی جب کہ دوسری طرف سے قابض فوجیوں نے فلسطینی نمازیوں کو قبلہ اول سے باہر نکالنے کیلئے ان پر طاقت کا استعمال کیا اور ان پر صوتی بم برسائے۔

(جاری ہے)

قابض افواج کی مخالفت میں نمازیوں کے ایک گروپ نے مسجد کے صحنوں میں اجتماعی نماز ادا کرنا شروع کردی۔جیسے ہی آباد کاروں کے پہلے گروہ نے الاقصی کے صحن پر دھاوا بولا تو وہاں پرموجود مردو خواتین نمازیوں نے تکبیر کے نعرے لگائے اور قبلہ اول کے دفاع کے عزم اور اس کی آزادی کے لیے نعرے لگائے۔