زیبا بختیار سے پہلے فلم حنا کی پیشکش مجھے ہوئی تھی ، لیلیٰ زبیری کا انکشاف

راج کپور سے شارجہ میں ملاقات ہوئی اور انھوں نے فلم میں کام کی پیشکش کی تھی، اداکارہ

منگل 8 اپریل 2025 19:50

زیبا بختیار سے پہلے فلم حنا کی پیشکش مجھے ہوئی تھی ، لیلیٰ زبیری کا ..

لاہور(اُردو پوائنٹ اخبارتازہ ترین - آن لائن۔ 08 اپریل2025ء)بھارتی فلم حنا میں ہیروئن کے کردار کے لیے جن پاکستانی اداکاراوں کو پیشکش ہوئی تھی ان میں ڈراما آرٹسٹس شہناز شیخ اور مرینہ خان کے ساتھ ساتھ لیلی زبیری بھی شامل ہیں۔ اس بات کا انکشاف لیلی زبیری نے ایک پوڈ کاسٹ میں گفتگو کے دوران کیا تھا۔ انھوں نے بتایا کہ راج کپور نے خود انھیں اس کردار کی پیشکش کی تھی۔

راج کپور کے ساتھ ملاقات کا احوال بتاتے ہوئے لیلی زبیری نے کہا کہ 1986 میں شارجہ کرکٹ کپ کے دوران راج کپور سے ملاقات ہوئی تھی۔لیلی زبیری نے بتایا کہ راج کپور پاکستانی اداکاروں کی صلاحیتوں سے کافی متاثر نظر آ رہے تھے۔اداکارہ نے بتایا کہ یہ وہ وقت تھا جب پاکستانی ڈراموں کو پونا اکیڈمی میں اداکاری سکھانے کے لیے دکھایا جاتا تھا۔

(جاری ہے)

لیلی زبیری نے کہا کہ اسی ملاقات میں راج کپور نے فلم حنا میں کام کی پیشکش کی تھی جو کہ اس سے قبل شہناز شیخ اور مرینہ خان کو بھی کی گئی تھی۔

لیلی زبیری نے کہا کہ میں نے راج کپور کی اس پیشکش کو شکریہ کے ساتھ مسترد کردیا تھا۔ادکارہ لیلی زبیری کا کہنا تھا کہ میرے شوہر پاک فوج کے افسر تھے اور مجھے یہ مناسب نہ لگا کہ میں بھارت جاکر کام کروں۔خیال رہے کہ فلم حنا میں ہیروئن کا کردار بعد ازاں پاکستانی اداکارہ زیبا بختیار نے ادا کیا تھا اور یہ فلم بلاک بسٹر ثابت ہوئی تھی۔