وزیر زراعت و لائیو سٹاک عاشق حسین کرمانی کی زیر پوٹھوہار ریجن کے ٹرانسفارمیشن پلان بارے جائزہ اجلاس

لاہور (اُردو پوائنٹ اخبارتازہ ترین - این این آئی۔ 09 اپریل2025ء)ملکی تاریخ میں پہلی بار وزیر اعلیٰ پنجاب مریم نواز شریف کے ویژن کے مطابق پوٹھو ہار ریجن کو زرعی ترقی کیلئے اہم قرار دیا گیا ہے اور اس علاقے میں زرعی ترقی اور کاشتکاروں کی خوشحالی کے لئے 10 ارب روپے مالیت کے میگا پلان کو منظوری کیلئے وزیر اعلیٰ پنجاب کو بھیجا جائے گا۔ ان خیالات کا اظہار صوبائی وزیر زراعت و لائیو سٹاک پنجاب سید عاشق حسین کرمانی نے زراعت ہاؤس لاہور میں منعقدہ پوٹھو ہار ریجن کے ٹرانسفارمیشن پلان کی صدارت کرتے ہوئے کیا۔

اجلاس میں پارلیمانی سیکرٹری برائے زراعت اُسامہ خان لغاری اور سیکرٹری زراعت پنجاب افتخار علی سہو بھی شریک تھے۔ اجلاس میں خطہ پوٹھو ہار کی زرعی ترقی اور کاشتکاروں کی خوشحالی کے لئے مختلف تجاویز پر غور کیا گیا۔

(جاری ہے)

اس موقع پر صوبائی وزیر زراعت و لائیو سٹاک نے کہا کہ حکومت پنجاب کا مقصد خطہ پوٹھو ہار میں کاشتکاروں کو سہولت فراہم کرنا اور اُن کے مسائل کو حل کرنا ہے۔

انھوں نے کہا کہ حکومت پنجاب خطہ پوٹھوہار میں مونگ پھلی کی پیداوار کو3 لاکھ ایکڑ تک بڑھانا چاہتی ہے۔اس کے علاوہ اس علاقے میں زیتون کی 2 ہزار ایکڑ پر کاشت کو یقینی بنایا جائے گا۔صوبائی وزیر نے پوٹھوہار ریجن میں ادرک کی کاشت کو فروغ دینے کے لئے بھی اقدامات اٹھانے کی ہدایت کی۔انھوں نے واضح کیا کہ اس پروگرام کے تحت مری کے باغات کی بحالی اور باڑوں کی تعمیر یقینی بنائی جائے گی۔

اس کے علاوہ معیاری بیج کی فراہمی،جدید زرعی تحقیق اور لیبارٹریوں کے قیام کے ذریعے زرعی ترقی اور کاشتکاروں کی خوشحالی کے لئے بھرپور اعانت کی جائے گی۔حکومت پنجاب اس ریجن میں لیزر لینڈ لیولرز،ڈرپ نظام آبپاشی کی تنصیب اور ویلیو ایڈیشن کے لئے تمام وسائل فراہم کرے گی۔پوٹھوہار ریجن میں 1 لاکھ ایکڑ رقبے کو جدید آبپاشی کے نظام کے ذریعے قابلِ کاشت بنایا جائے گا اور فصلوں کیلئے پانی کی کمی دور کرنے کے لئے چھوٹے ڈیمز، تالاب اور کنویں بنائے جائیں گے۔

اس پروگرام کے تحت خطہ پوٹھو ہار میں واٹر سٹوریج کو 35 ہزار فٹ تک بڑھایا جائے گا۔اس کے علاوہ ہائی ویلیو ایگریکلچر اور زمینی کٹاؤ کو کم کرنے کے لئے بھی اقدامات اٹھائے جائیں گے۔ اس موقع پر صوبائی وزیر نے پوٹھو ہار ریجن میں نامیاتی سبزیات کی500 ایکڑ کاشت کیلئے حکمت عملی مرتب کرنے کی ہدایت کی۔ اس موقع پر سیکرٹری زراعت پنجاب افتخار علی سہو نے کہا کہ پوٹھو ہار ریجن ٹرانسفارمیشن پلان پر ٹائم لائنز کے مطابق عملدرآمد جاری ہے۔

اس علاقے میں ہائی ویلیو ایگریکلچر کے فروغ اور نظام آبپاشی میں بہتری کے لئے اقدامات اٹھائے جا رہے ہیں۔ اجلاس میں اسپشل سیکرٹری زراعت آغا بنیل اختر، ایڈیشنل سیکرٹری زراعت(پلاننگ) کیپٹن(ر) وقاص رشید،ڈائریکٹر جنرلز زراعت چوہدری عبدالحمید، نوید عصمت کاہلوں، رانا تجمل،ڈاکٹر عبدالقیوم، ساجد الرحمان، کنسلٹنٹ محکمہ زراعت پنجاب ڈاکٹر محمد انجم علی، چیف ایگزیکٹو پارب ڈاکٹر عابد محمود و دیگر افسران شریک ہوئے۔