Live Updates

پی ایس ایل 10 کی سکیورٹی، سٹیڈیمز کے اطراف انٹیلی جنس آپریشنز کرنے کا فیصلہ

لاہور میں 13، راولپنڈی میں 11 اور ملتان میں 5 پی ایس ایل میچز کھیلے جائیں گے

ذیشان مہتاب جمعرات 10 اپریل 2025 13:29

پی ایس ایل 10 کی سکیورٹی، سٹیڈیمز کے اطراف انٹیلی جنس آپریشنز کرنے ..

لاہور (اردو پوائنٹ تازہ ترین اخبار ۔ 10 اپریل 2025ء ) پاکستان سپر لیگ (پی ایس ایل) 2025ء کے دوران پولیس کا سکیورٹی اور ٹریفک پلان جاری کر دیا گیا۔

ترجمان پنجاب پولیس کے مطابق لاہور میں میچز کے دوران 8 ہزار سے زائد افسران و اہلکار ڈیوٹی انجام دیں گے جبکہ راولپنڈی میں میچز کے دوران 5 ہزارافسران اوراہلکار ڈیوٹی پرمامور ہوں گے اسی طرح ملتان میں 8 ہزار افسران و اہلکار ڈیوٹی انجام دیں گے۔

آئی جی پنجاب پولیس عثمان انور نے ہدایت کی کہ سٹیڈیمز کے اطراف انٹیلی جنس آپریشنز کیے جائیں اور میچز کے دوران ٹریفک کی روانی برقرار رکھی جائے۔

پاکستان سپر لیگ 2025ء کے دوران راولپنڈی پولیس کے فول پروف سیکورٹی انتظامات کر لیے گئے، راولپنڈی پولیس کے 5 ہزار سے زائد افسران فرائض سرانجام دیں گےجبکہ ٹریفک کی روانی کو برقرار رکھنے کے لیے ٹریفک پولیس کے 367 افسران فرائض سرانجام دیں گے۔

(جاری ہے)

سی پی او سید خالد ہمدانی نے کہا کہ انتظامات کی سی سی ٹی وی مانیٹرنگ کے لیے خصوصی کنٹرول روم قائم کیا گیا ہے اور اسٹیڈیم کے گردونواح میں ایلیٹ فورس، ڈولفن فورس اور تھانوں کی موبائلز گشت کے فرائض سرانجام دیں گی۔

انہوں نے کہا کہ کرکٹ ٹیموں کے روٹ کی مؤثر سکیورٹی کے ساتھ ساتھ چھتوں پر سنائپرز تعینات کیے گئے ہیں اور میچ دیکھنے کے لیے آنے والے شائقین کرکٹ کو واک تھرو گیٹ اور مکمل باڈی سرچنگ کے بعد سٹیڈیم میں داخلے کی اجازت دی جائے گی۔

سی پی او کے مطابق تمام سینئر افسران فیلڈ میں موجود رہ کر ڈیوٹی پر مامور افسران کو چیک اور بریف کریں گے جبکہ میچز کے دوران سکیورٹی انتظامات کے ساتھ ساتھ ٹریفک کی بلاتعطل روانی کو یقینی بنایا جائے گا۔

انہوں نے کہا کہ پاک فوج، رینجرز، دیگر سیکورٹی اداروں اور ضلعی انتظامیہ کے تعاون سے فول پروف سیکیورٹی انتظامات کو یقینی بنایا جائے گا اور پاکستان سپر لیگ میچز کے دوران شہریوں کو ہر سہولت اور خوشگوار ماحول کی فراہمی کے لیے ہر ممکن اقدامات کیے جا رہے ہیں۔

واضح رہے کہ لاہور میں 13، راولپنڈی میں 11 اور ملتان میں 5 پی ایس ایل میچز کھیلے جائیں گے۔