Live Updates

چیئرمین کابینہ کمیٹی برائے امن و امان خواجہ سلمان رفیق کی زیر صدارت ایس سی سی ایل او کا اجلاس،امن و امان کی صورتحال کا جائزہ لیا

جمعہ 11 اپریل 2025 23:07

لاہور (اُردو پوائنٹ اخبارتازہ ترین - اے پی پی۔ 11 اپریل2025ء) صوبائی وزیر صحت و چیئرمین کابینہ کمیٹی برائے امن و امان خواجہ سلمان رفیق کی زیر صدارت محکمہ داخلہ میں ایس سی سی ایل او کا 26 واں اجلاس منعقد ہوا ،جس میں صوبہ بھر کے امن و امان کی تازہ صورتحال کا تفصیلی جائزہ لیا گیا۔اس موقع پرسیکرٹری داخلہ پنجاب نے اجلاس کو بریفنگ دی۔اجلاس میں پاکستان سپر لیگ ایڈیشن 10 کے سکیورٹی انتظامات اور غیرقانونی طور پر مقیم افغان باشندوں کی واپسی آپریشن کا جائزہ لیا گیا۔

صوبائی وزیر صحت و چیئرمین کابینہ کمیٹی برائے امن و امان نے کہاکہ پی ایس ایل اورآئی سی سی ویمن کرکٹ ورلڈ کپ میچز کیلئے بہترین سکیورٹی انتظامات کئے گئے ہیں۔ خواجہ سلمان رفیق نے کہاکہ میچز و دیگر مواقع پر کرائے کی بجائے مستقل بنیادوں پر کیمرے اور دیگر آلات نصب کئے جائیں،محکمہ داخلہ پنجاب اس حوالے سے تمام متعلقہ اداروں سے مکمل کوآرڈینیشن میں ہے،سکیورٹی اداروں اور انتظامیہ کو تمام وسائل فراہم کردیئے ہیں۔

(جاری ہے)

انہوں نے کہاکہ عوام کے جان و مال کا تحفظ ریاست کی اولین ترجیح ہے۔سیکرٹری داخلہ پنجاب نور الامین مینگل، ایڈیشنل آئی جی پنجاب شہزادہ سلطان، سپیشل سیکرٹری داخلہ فضل الرحمان، سی ٹی ڈی، سپیشل برانچ، پی سی بی اور متعلقہ اداروں کے حکام جبکہ پنجاب بھر سے کمشنرز اور آر پی اوز نے ویڈیو لنک کے ذریعے اجلاس میں شرکت کی۔