ملک میں فی تولہ سونے کی قیمت میں تاریخی اضافہ، نئی قیمت 3لاکھ 38ہزار سے تجاوز کرگئی

سونے کی قیمت کی اونچی اڑان، فی تولہ سونا 10 ہزار روپے مزید مہنگا ہوگیا، تین روز میں فی تولہ سونے کی قیمت میں 20 ہزار 800 روپے بڑھ گئی

ثنااللہ ناگرہ جمعہ 11 اپریل 2025 19:24

ملک میں فی تولہ سونے کی قیمت میں تاریخی اضافہ، نئی قیمت 3لاکھ 38ہزار ..

کراچی ( اردوپوائنٹ اخبار تازہ ترین۔ آئی پی اے ۔ 11 اپریل 2025ء ) عالمی مارکیٹ میں سونے کی قیمتوں میں اتار چڑھاؤ کا سلسلہ جاری ہے، عالمی منڈی میں سونے کے نرخ بڑھنے پر پاکستان میں بھی قیمتوں میں نمایاں اضافہ ہوگیا ہے۔ میڈیا رپورٹ کے مطابق عالمی مارکیٹ میں سونے کی قیمتوں میں اضافہ ہونے کے باعث پاکستان میں بھی سونے کی قیمت بڑھ گئی ہے۔ بڑے اضافے کے بعد فی تولہ سونے کی نئی قیمت بلند ترین سطح پرپہنچ گئی ہے۔

گزشتہ تین روز میں فی تولہ سونے کی قیمت میں 20 ہزار800 روپے بڑھ گئی ہے۔ آج ملک میں فی تولہ سونے کی قیمت میں 10ہزار روپے کا تاریخی اضافہ ہوا ہے۔ فی تولہ سونے کی قیمت بڑھنے کے بعد مقامی صرافہ بازاروں میں نئی قیمت 3 لاکھ 38 ہزار800 روپے کی بلند ترین سطح پر پہنچ گئی ہے۔

(جاری ہے)

اسی طرح دس گرام سونے کی قیمت بھی بڑھ گئی ہے۔ 10 گرام سونے کی قیمت میں 8 ہزار573 روپے کا اضافہ ہوا ہے۔

نئی قیمت 2 لاکھ 90 ہزار466 روپے کی سطح پر پہنچ گئی ہے۔ یاد رہے عالمی مارکیٹ میں فی اونس سونے کی قیمت بڑھ کر 3 ہزار 212 ڈالر ہو گئی ہے۔

دوسری جانب نیوزایجنسی کے مطابق پاکستان کی انٹربینک مارکیٹ میں امریکی ڈالر کے مقابلے میں پاکستانی روپے کی قدر میں اضافہ ریکارڈ کیا گیا ہے۔سٹیٹ بینک آف پاکستان کے مطابق جمعہ کو انٹربینک مارکیٹ میں امریکی ڈالر کے مقابلے میں پاکستانی روپے کی قدر میں 09 پیسے کا اضافہ ریکارڈ کیا گیا ہے جس کے بعد اس کی نئی قیمت 280 روپے 46 پیسے ہو گئی ہے۔

انٹربینک مارکیٹ میں سعودی ریال کی قدر 74 روپے 71 پیسے جبکہ بحرینی دینار کی قدر 744 روپے 03 پیسے رہی۔اسی طرح عمانی ریال کی انٹربینک مارکیٹ میں قدر 728 روپے 51 پیسے رہی، کویتی دینار کی قدر 915 روپے 33 پیسے اور قطری ریال کی قدر 76 روپے 94 پیسے ریکارڈ کی گئی۔ اسی طرح اوپن مارکیٹ میں امریکی ڈالر کی قیمت خرید 280 روپے 46 پیسے اور قیمت فروخت 282 روپے 15 پیسے ریکارڈ کی گئی۔