سپیکر اور ڈپٹی سپیکرقومی اسمبلی کی بیساکھی کے پرمسرت تہوارکے موقع پر سکھ برادری کو مبارکباد

اسلام آباد (اُردو پوائنٹ اخبارتازہ ترین - اے پی پی۔ 13 اپریل2025ء) سپیکر قومی اسمبلی سردار ایاز صادق نے بیساکھی کے پرمسرت تہوار کے موقع پر پاکستان سمیت دنیا بھر میں بسنے والی سکھ برادری اور خاص طور پر بیساکھی میلہ کے موقع پر پاکستان آئے ہوئے سکھ یاتریوں کو مبارکباد پیش کی ہے۔ اتوار کو قومی اسمبلی سیکرٹریٹ کے ڈائریکٹوریٹ جنرل آف میڈیا کے مطابق اپنے تہنیتی پیغام میں سپیکر قومی اسمبلی نے کہا کہ بیساکھی محبت، خوشی اور بہار کی علامت ہے ، یہ تہوار خوشی، شکرگزاری اور نئی امیدوں کا پیغام لے کر آتا ہے۔

انہوں نے کہا کہ بیساکھی نہ صرف سکھ برادری کے لیے مذہبی اہمیت کا حامل ہے بلکہ یہ موسم بہار کی آمد کا ایک خوبصورت تہوار بھی ہے جو ہماری سرزمین کے تنوع اور رنگینی کو مزید نکھارتا ہے۔

(جاری ہے)

سردار ایاز صادق نے کہا کہ پاکستان مختلف مذاہب، قوموں اور ثقافتوں کا ایک خوبصورت گلدستہ ہے ، یہاں مذہبی و ثقافتی تہوار معاشرتی تنوع اور ہم آہنگی کے اظہار کا ذریعہ ہیں۔

انہوں نے کہا کہ پاکستان میں اقلیتیں قومی ترقی، معاشرتی ہم آہنگی اور یکجہتی کے فروغ میں اہم کردار ادا کر رہی ہیں۔ سپیکر قومی اسمبلی نے اس بات پر زور دیا کہ پاکستان کا آئین تمام شہریوں کو مساوی حقوق فراہم کرتا ہے اور ملک میں بسنے والی اقلیتوں کو اپنے مذہبی تہوار کو رسم و رواج کے ساتھ منانے کی مکمل آزادی حاصل ہے۔ انہوں نے مزید کہا کہ پاکستان کی پارلیمان اقلیتوں کے حقوق کے تحفظ کے لیے پرعزم ہے ، اقلیتوں کے مذہبی تہواروں کا احترام پاکستان کی پارلیمان، حکومت ، عوام کی رواداری اور بین المذاہب ہم آہنگی کی عکاس ہے۔

اس موقع پر انہوں نے دنیا بھر سے پاکستان آئے ہوئے سکھ یاتریوں کو خوش آمدید کہتے ہوئے اس امید کا اظہار کیا کہ ان کا پاکستان میں قیام خوشگوار اور روحانی طور پر پرسکون ہوگا۔بیساکھی کے پر مسرت موقع پر ڈپٹی سپیکر قومی اسمبلی سید غلام مصطفی شاہ نے سکھ برادری سے تعلق رکھنے والے اراکین پارلیمنٹ سمیت پوری سکھ برادری کو مبارکباد پیش کی ہے۔

انہوں نے اپنے تہنیتی پیغام میں کہا کہ بیساکھی امن، محبت اور بھائی چارے کا پیغام ہے جو معاشرے میں ہم آہنگی اور یکجہتی کو فروغ دیتا ہے۔انہوں نے بین المذاہب ہم آہنگی کی ضرورت پر زور دیتے ہوئے کہا کہ بیساکھی جیسے مواقع مختلف مذاہب اور اقوام کے درمیان تعلقات کو مضبوط بنانے کا ذریعہ بنتے ہیں۔ انہوں نے کہا کہ پاکستان ایک کثیرالثقافتی اور کثیرالمذاہب ملک ہے جہاں تمام شہریوں کو اپنے مذہب، عقیدے اور رسم و رواج کے مطابق آزادی سے زندگی گزارنے کا مکمل حق حاصل ہے۔

ڈپٹی سپیکر قومی اسمبلی نے مزید کہا کہ پاکستان میں بسنے والی تمام قومیں ریاست کی طرف سے مساوی حقوق کی حامل ہیں اور مذہبی تہوار منانے کی مکمل آزادی انہیں حاصل ہے۔ ایسے مواقع قومی یکجہتی، رواداری اور احترامِ انسانیت کو فروغ دیتے ہیں۔انہوں نے امید ظاہر کی کہ بیساکھی کا یہ تہوار سکھ برادری کے لیے خوشیوں کا پیغام لائے اور ملک بھر میں محبت، ہم آہنگی اور امن کے فروغ کا باعث بنے۔