سپریم کورٹ کی نومئی واقعات سے متعلق کیسز کا ٹرائل چار ماہ میں ٹرائل مکمل کرنے کی ہدایت

ْتمام ملزمان کے قانونی حقوق، فرد جرم اور متعلقہ دستاویزات کی فراہمی یقینی بنائیں گے،عدالت

پیر 14 اپریل 2025 17:05

سپریم کورٹ کی نومئی واقعات سے متعلق کیسز کا ٹرائل چار ماہ میں ٹرائل ..

اسلام آباد(اُردو پوائنٹ اخبارتازہ ترین - این این آئی۔ 14 اپریل2025ء)سپریم کورٹ نے نومئی واقعات سے متعلق کیسز کا ٹرائل چار ماہ میں ٹرائل مکمل کرنے کی ہدایت کردی جبکہ عدالت نے کہاہے کہ تمام ملزمان کے قانونی حقوق، فرد جرم اور متعلقہ دستاویزات کی فراہمی یقینی بنائیں گے۔سپریم کورٹ نے 9 مئی کے واقعات سے متعلق کیسز کی سماعت کے دوران اہم فیصلے اور ہدایات جاری کی ہیں۔

چیف جسٹس یحییٰ آفریدی کی سربراہی میں تین رکنی بینچ نے سماعت کی جس میں عدالت نے عمر سرفراز چیمہ کو نوٹس جاری کرتے ہوئے کیس کی مزید سماعت جمعرات تک ملتوی کر دی۔طیبہ راجہ سمیت دیگر ملزمان سے متعلق پنجاب حکومت کی اپیلیں نمٹا دی گئیں اور عدالت نے ہدایت کی کہ ان کیسز میں چار ماہ کے اندر ٹرائل مکمل کیا جائے۔

(جاری ہے)

عدالت نے واضح کیا کہ تمام ملزمان کو ان کے قانونی حقوق، فرد جرم اور متعلقہ دستاویزات کی فراہمی یقینی بنائی جائے گی۔

چیف جسٹس نے ریمارکس دئیے کہ عدالتی حکم میں ان نکات کی وضاحت بھی کی جائے گی۔سماعت کے دوران فواد چوہدری نے مؤقف اپنایا کہ سپریم کورٹ سے انسداد دہشتگردی عدالتوں کو ایک خط بھیجا گیا تھا جس کے بعد انہیں خصوصی عدالتوں میں تبدیل کر دیا گیا۔ اس پر چیف جسٹس نے ریمارکس دئیے کہ جب عدالتی حکم جاری ہی نہیں ہوا تو خط کیسے بھیجا گیا اگر کوئی ایسا خط جاری ہوا ہے تو اسے فوری واپس لیا جائے۔

پراسیکیوٹر ذوالفقار نقوی نے اس خط سے لاعلمی کا اظہار کیا۔عدالت نے 9 مئی سے متعلق تمام مقدمات جمعرات کو دوبارہ مقرر کرنے کی ہدایت بھی جاری کی۔جناح ہاؤس حملہ کیس میں ملزم علی رضا کے وکیل نے موکل کی بیماری کے پیش نظر ضمانت کی درخواست کی جس پر چیف جسٹس نے ریمارکس دئیے کہ اگر میڈیکل گراؤنڈ پر ضمانت دی گئی تو پھر تمام قیدیوں کو رہا کرنا پڑے گا۔ عدالت نے اس کیس کی سماعت بدھ تک ملتوی کر دی۔