خیبر پختونخوا،عالمی بینک کا اربوں روپے کا منصوبہ اہداف حاصل کرنے میں ناکام

خیبرپختونخوا میں ابتدائی تعلیم تک رسائی میں بہتری لانے لئے مختص فنڈز بھی خرچ نہ ہوسکے،دستاویز

پیر 14 اپریل 2025 22:35

پشاور(اُردو پوائنٹ اخبارتازہ ترین - این این آئی۔ 14 اپریل2025ء)محکمہ تعلیم خیبرپختونخوا عالمی بینک کا اربوں روپے کا منصوبہ اہداف حاصل کرنے میں ناکام ہوگیا۔دستا ویز کے مطابق عالمی بینک کے 115ملین ڈالر منصوبے میں محکمہ تعلیم خیبرپختونخوا صرف 24ملین ڈالرز ہی خرچ کرسکا ہے۔خیبرپختونخوا میں ابتدائی تعلیم تک رسائی میں بہتری لانے کیلئے مختص فنڈز بھی خرچ نہ ہوسکے، تعلیم تک رسائی کیلئے مختص 81ملین ڈالر میں صرف 12ملین ڈالرز خرچ ہوئے ہیں۔

،دستاویز کے مطابق اساتذہ کی بہتر تربیت اور طلبا اسکلز بہتر بنانے کیلئے مختص 8ملین ڈالر میں 1ملین ڈالر کا استعمال ہوا۔سیلاب سے متاثرہ سکولوں کی دوبارہ تعمیر و بحالی کیلئے 18ملین ڈالر میں صرف 6ملین ڈالر خرچ ہوسکے ۔رپورٹ کے مطابق ورلڈ بینک کے تعاون سے خیبرپختونخوا کے 12اضلاع میں سکولوں کی بحالی،نئے کلاس رومز قائم ہونے تھے جس میں اساتذہ اور طلبا کی بہتری پر کام بھی منصوبے میں شامل تھا۔

(جاری ہے)

ایڈیشنل سیکرٹری محکمہ تعلیم قیصر عالم نے کہا کہ منصوبے کی منظوری 2020میں ہوئی جس کو 2025تک مکمل ہونا تھا، ورلڈ بینک کا بہترین منصوبہ ہے۔ایڈیشنل سیکرٹری محکمہ تعلیم کے مطابق منصوبے کی اہمیت کو دیکھتے ہوئے اسے توسیع دی گئی ہے۔انہوں نے کہا کہ رواں سال مکمل ہونے والا منصوبہ اب 2026میں مکمل ہوگا،انہوں نے بتایا کہ تباہ شدہ سکولز کی بحالی اور دیگر اہداف پر تیزی کے ساتھ کام جاری ہے۔