معروف اداکارہ مہر النسا برطانیہ میں شادی کے بندھن میں بندھ گئیں

اداکارہ کے سادگی سے ہونے والے نکاح کی خوبصورت تصاویر سوشل میڈیا پر وائرل

منگل 15 اپریل 2025 10:30

لندن(اُردو پوائنٹ اخبارتازہ ترین - این این آئی۔ 15 اپریل2025ء)پاکستانی معروف اداکارہ مہرالنسا اقبال برطانیہ میں رشتہ ازدواج میں منسلک ہو گئیں۔فوٹو اینڈ ویڈیو شیئرنگ پلیٹ فارم انسٹاگرام پر اداکارہ کے نکاح کی مختلف ویڈیوز اور تصاویر سامنے آئی ہیں، شادی کی مختصر تقریب کا اہتمام برطانیہ کی پہلی مسجد میں کیا گیا، جس میں سابق گورنر پنجاب سلمان تاثیر کے بیٹے شہباز تاثیر اور بہو نیہا تاثیر سمیت قریبی عزیزوں اور دوست احباب نے اداکارہ کی شادی میں شرکت کی۔

(جاری ہے)

سوشل میڈیا پر وائرل تصاویر میں مہرالنسا کو سرخ لہنگے میں دیکھا جاسکتا ہے جس پر سنہرا لیس ورک کیا گیا ہے، اداکارہ کے دولہا نے مسجد میں ہونے والے نکاح کے موقع پر سرمائی رنگ کے سوٹ کا انتخاب کیا۔اداکارہ کے سادگی سے ہونے والے نکاح کی خوبصورت تصاویر سوشل میڈیا پر خوب وائرل ہو رہی ہیں، وائرل تصاویر اور ویڈیوز سے معلوم ہوتا ہے کہ ان کے نکاح کی مختصر تقریب کا اہتمام گزشتہ روز کیا گیا تھا اور ان کے دولہا میاں کا نام زکریا ہے۔وائرل تصاویر و ویڈیوز کے کمنٹس میں تبصرہ کرتے ہوئے مداحوں، ساتھی فنکاروں اور دوست احباب کی جانب سے مبارک باد اور نیک خواہشات کا سلسلہ جاری ہے۔